Garbo ug pasigarbo

Nauso karon ang vlogging tungod kay nakita sa pipila nga mokita ug makakuwarta sila niini. Kini ang hinungdan bisan unsa na lamang ang makita nato sa social media. Usa sa makita nato ang gitawag nga poor pornography.

Ang pornograpiya sa kakabus, o pornograpiya sa gutom, gihubit nga bisan unsang klase sa media, gisulat man kini, litrato o gi-film, nga nagpahimulos sa kahimtang sa mga kabus aron makamugna sa gikinahanglan nga simpatiya, alang sa pagdugang sa mga donasyon sa kaluoy, o suporta alang sa usa ka katuyoan.

Akong gihisgotan dinhi ang pornograpiya sa kakabus tungod sa nakita nako sa telebisyon nga gilabay sa usa ka amahan ang gihatag nga groceries ngadto sa duha niya ka anak dihang iyang nakita nga gikuhaan kini og video sa vlogger nga naghatag.

Gikasuko sa amahan ang pagkuha og video sa iyang duha ka anak tungod kay nagpakauwaw kuno kini kaniya. Unsa nalang kuno ang ikasulti sa mga tawo nga makakita sa video sa vlogger. Garbo ang gipatigbabaw sa amahan.

Dili dautan ang pagtabang sa mga kabus. Ang dautan mao ang pagpahimulos sa ilang kahimtang. Aron masuta kun ang pagtabang sa mga kabus pagpahimulos ba kini sa ilang kahimtang, kinahanglan nga tan-awon ang mga nagapalibot sa tabang.

Ang pagtabang sa mga kabus nga nakabasi sa donasyon kinahanglan nga ipahibawo kay kabahin kini sa transparency. Aron makita sa mga donors nga naabot gayod ngadto sa mga benepisyaryo ang ilang gitunol nga donasyon. Mao ni ang rason nga kuhaan gayod og video sa mga vlogger sa pornograpiya sa kakabus ang ilang paghatag sa donasyon.

Apan ang tabang nga gikuot sa kaugalingong bulsa sa naghatag wala kini kinahanglana nga i-video tungod kay wala siyay angayan nga pahibawon sa iyang paghatag. Kun ugaling iya kining himoon usa na kini ka pagpasigarbo.