Tamparos sa mga Marcos

Panahon sa pagpamunoan ni anhing Presidente Ferdinand E. Marcos Sr. (FEM), kinsa mideklarar og Martial Law aron puohon ang mga terorista-walhong grupo, puwerting panago nilang mga New People’s Army sa kabukiran kay hadlok hutdog patay sa mga sundalo.

Gipatak-om sa presidenting diktador ang tanang baba sa mga news outlets. Newspaper lang ug radio-tv network nga iyaha pabor sa Marcos regime ang solong gitugotan.

Mga aktibista-raliyesta nga mopalanog sa ilang sentimento batok sa mga kahiwiang gihimo sa presidenting daw dili na gustong magpapuli sa puwesto, gipang-abog ug gipamatay.

Tungod sa 1986 People’s Power sa Edsa, napakanaog-napalayas og ahat ang Unang Pamilyang Marcos sa Malakanyang. Ug sugod sa maong higayon, hasta kapila na lang mag-ilis-ilis og Presidente ang Pilipinas matag unom ka tuig, gihugawhugawag samot ilang bansagon. Gani, gibunyagan pag ‘kawatan’ ug gipaylag daghang kaso aron mabawi sa gobiyerno ang binilyong salapi nga ilang nasurikbot.

Hinungdan, naglisod gyod ang pamilyang Marcos paglimpyo sa nagkalapok nilang bansagon ug daw nawad-an nag paglaom nga makabalik sa Malakanyang.

Mao nga sa usa ka interview nga gipahigayon sa usa ka sikat TV-host, dihang gipangutana ang magtiayong Bongbong-Liza kon unsay ilang gihimo niadtong maong mga adlaw, diin nasinati nila ang grabing depresiyon, nadakin-as ilang dila ug mitug-ang nga nagpalaban sila sa gahom sa cocaine. (Hinuon, gi-delete kini ug dili na makita.)

Unta, magpasalamat sila sa mga Duterte, SMNI, Kingdom of Jesus Christ Pastor C. Quiboloy, BBM-SARA Uniteam vloggers sama ni Sass, Maharlika, Banat By brothers ug daghan pa, kinsa nagtinabangay nga malimpyo ang nagkahugaw nang imahe sa mga Marcos ug maoy nakapabalik nilag kupot sa renda sa palasyo.

Apan naunsa ba kining hitaboa nga imbes ipadayon nila ang paglinis, gidoble man hinuon ni PBBM, Liza Marcos-Araneta ug Martin Romualdez ang paghugawhugaw sa hugaw na kaayo nila daan nga imahe?

Lalim bay, ang mga kanhi NPA uban sa pro-good-governance nang cadres nga  sila si Ka Eric ug Ka Peter, kinsa maoy gipanggukod sa gobiyerno kaniadto, karon maoy nay miggukod sa administrasiyong Marcos Jr.? Dili ba dako kaayo kining tamparos?

Hoy, PBBM, ayaw intawon pakaulawi ang kapin 32M ka botantenting maoy mipadaog nimo, uy! Pagtinarong na intawon, Dodong, before it’s too late!