EDITORYAL - Mga trolls sa China milihok
![EDITORYAL - Mga trolls sa China milihok](https://media.philstar.com/photos/2024/02/29/1_2024-02-29_23-53-31.jpg)
Kinahanglang magmatngnon ug magmabinantayon ang publiko batok aning mga balita, opinyon ug mga estorya gikan sa nagkalain-laing tinubdan, sa media man o sa social media bahin sa China nga nagpakitang makatarunganon ang ilang mga gipanghimo didto sa West Philippine Sea.
Ang China naputos karon sa pagsaway gikan sa nagkalain-laing suok sa kalibotan gawas nalang tingali sa mga lugar nga panitika’g baki nga wala maabot og internet.
Gisaway sila tungod sa ilang ilegal nga pag-okupar sa mga teritoryo sa mga silingang nasud sa South China Sea apil na ang sa Pilipinas nga WPS.
Sukwahi sa panahon sa kanhi administrasyong Duterte nga gidudahang pro-China, sa administrasyong Marcos karon, nakatingog na ang PCG, ang Armed Forces of the Philippines ug ang mga hut-ong sa mga mananagat batok sa China.
Karon, tanang gipanghimo sa China sa WPS gi-report na ngadto sa media, kaniadto gibawalan ang media makalawig didto.
Ang China nagpabaga nalang sa ilang nawong niining ilang pagpaugat pag-angkon sa WPS bisan ang International Tribunal niadtong 2016 miingon nga ilegal ang naghinobrang pangangkon sa maong nasud sa mga teritoryo sa mga silingan niini.
Sa kadako sa ilang populasyon nga moabot og sobra usa ka bilyon nagkinahanglan ang China og dako ug lapad nga kakuhaan og pagkaon ug uban pang resources ug ang WPS usa sa makahatag niini kanila.
Tungod kay ang Pilipinas huyang man og kasundalohan ug dunay mga lider nga dili magkahiusa ug labaw pa gyud nga dunay mga nidapig kanila, sayon ra para sa China ang pagpangilog sa WPS.
Si Philippine Coastguard Spokesman Commodore Jay Tarriela miingon nga nabantayan nila karon ang pagdaghan sa mga pro-China trolls ug influencers sa social media. Makita kini sa mga nikomento sa mga balita batok sa China ug mga balitang nagpahumot kanila.
Kaning mga trolls ug influencers kun sa media pa, mga AC/DC o kadtong attack-and-collect ug defend-and-collect. Masuko sila kun dunay balitang negatibo o makadaut sa China ug ilaha sawayon ang gihimo sa Pilipinas ug depensahan sab ang China.
Dunay kwartang gipalihok para pahalipay, sweldo, libreng bakasyon, libreng paospital, libreng panihapon ug uban pa gikan sa mga opisyales sa embahada ug konsulada sa China dinhi sa nasud?
- Latest