Ambot unsay mas sakit para ni Joey Daluz, tsirman sa Metro Cebu Water District (MCWD): Ang pagsugo ni Cebu City Mayor Mike Rama, nga iyang alyado sa politika, nga taktakon siya sa puwesto; o ang pagkutlo ni Rama sa desisyon sa korte nga nipatigbabaw sa gikuwestiyon nga pagkatudlo ni Daluz sa puwesto.
Ambot unsay mas lisod para ni Daluz: Ang pagpilit sa puwesto nga laktod sab niyang nakuha; o ang pagpaabot nga dasonan sa Local Water Utilities Administration (LWUA) ang iyang pagkataktak, kay mas suod man si Rama sa Malakanyang.
* * *
Ambot may makalabaw ba sa kahilas sa grupo sa mga kanhi opisyal sa Cebu City Hall:
• Gikuwestiyon nila ang kahimtang sa panglawas ni Mayor Rama tungod sa giingon nga pagsige og absent (pagbakasyon nga gidudahang pantalya lang sa pagpatambal), pag-niwang, pagluspad ug pagkaluya; pero
• Sila sab ang gipasanginlan nga nitago sa tinuod nga sakit ni anhing Mayor Edgar Labella, kansang kaluya ug pagsige og ka-ospital gikataho nga ilang gipahimuslan aron sa pagpalusot sa kontrobersiyal nga binilyon ka pesos nga balor sa mga transaksiyon sa City Hall.
* * *
Ambot may makalabaw pa ba sa kabakikaw nga nahiagoman sa mga dumadapig nilang Rama ug Labella:
• Gipakatap nila ang mga hunungihong sa daghan nang katuigan nga himatyon si kanhi Mayor Tommy Osmeña tungod sa nagkagrabe niyang sakit nga kanser; samtang
• Balikbalik sila og pasalig nga ordinaryo rang ubo ang nahiagoman ni Labella bisan wa nang kapakita sa daghang mga buwan sa City Hall dayon niyang kamatay; ug
• Karon si Rama na sab ang gitunglo tungod sa pagpamiyahok sa iyang dagway.
* * *
Ambot unsay mas tam-is para ni kanhi Mayor Osmeña:
• Pagpangita sa mga Sugboanon sa talagsaon niyang liderato dihang nisulbong pag-ayo ang mga nangamatay ug mga nangasakit, nagkayamukat ang lokal nga mga opisyal sa pagduma sa pandemya ug gika-intapan ang Cebu City nga Covi-19 capital sa Pilipinas; o
• Pagpangita sa mga Sugboanon hain na ang binilyon ka pesos nga halin sa mga luna sa South Road Properties (SRP), nga gitukod ni Osmeña pero gi-harab-harab og baligya sa mga nipuli niya, karong nagkalaksot ang syudad ug nibusdik ang burukrasya sa City Hall, samtang nagkarambola nang mga dumadapig nilang Rama ug Labella.
* * *