EDITORYAL — Food stamp sa DSWD maayo, apan

Nindot kining bag-ong programa sa Department of Social Welfare and Development (DSWD) nga food stamp program nga ang tumong matabangan ang usa ka milyong kabus nga pamilya nga naglisud makakaon og katulo sa usa ka adlaw.

Kaning maong programa dili hinuon sama sa Pantawid Pamilyang Pilipino Program (4Ps) sa DSWD nga kwarta ang itunol ngadto sa mga benepisaryo. Ang food stamp mura og card nga dunay sulod nga P3 mil nga magamit lang para ipalit og pagkaon.

Nindot kini, kay sayod man ang kadaghanan nga ang kwarta sa 4Ps , wala gamita sa ubang benepisaryon sa katuyoan, kay gisugal ang kwarta ug wala ipalit og pagkaon ug gamit sa pagtungha sa ilang mga anak.

Kaning food stamp pinasubay kini sa tinguha ni Presidente Ferdinand Marcos Jr. nga “Walang Gutom 2027.” Nindot paminawon apan dili sigurado kun matinuod ba gyud nga wala nay pamilyang Pilipino nga gutomon anang tuiga.

Apan kinahanglang magmatngon ang DSWD, mas maayong ilang unahon sa paghatag niini ang mga kabus nga naa sa probinsya o mga hilit nga lugar. Kadtong mga nitibo nga nagmantinil og kamote o saging sa adlaw-adlaw nilang pagkaon.

Sila kadtong mga nabuhi lang pinaagi sa ilang mga pananom apan tungod sa gamay nga kita gikan sa abot, ug mga katalagman, naglisod na pagpatungha sa ilang mga anak.

Dili sab sila benepisaryo sa 4Ps tungod sa mga politikanhong babag kay dili sila mga botante sa ilang barangay.  Sila kadtong mga gitawag kaniadto ni kanhi bise presidente Leni Robredo nga mga naa sa “laylayan”, mga Pilipinong wala lingia bisan sa ilang mga lokal nga opisyal kay sila walay edukasyon ug walay mga dokumento nga sila botante.

Kay kun kini anha gihapon ipangapud-apod sa mga siyudad nga duna say daghang mga kabus, siguradong maabusar lang kini sama sa nahitabo sa 4Ps.

Usa pa, makatabang kaayo kining food stamp nga mamenus-menusan ang mga libud-suroy sa mga siyudad. Kay sagad kanila, gikan sa probinsya nga walay makaon didto maong nitaak sila sa mga siyudad aron mangayo og limos. Unahon ang mga naa sa hilit nga mga lugar, kay sila maoy nananom, namuhi og mga hayop nga makatabang sa supply sa pagkaon sa merkado.