Kinsa ang nagsulti sa tinuod

Gusto nga ipribado ni Mayor Mike Rama ang Metro Cebu Water District (MCWD). Ibaligya sa Mayor ang MCWD ngadto sa Villar Group of Companies. Gamiton usab sa mayor ang MCWD building aron himoon nga satelite office sa mayor nga walay bayad. Wala mosugot niini ang chairman sa MCWD nga si Atty. Joey Daluz. Mao ni ang akong nahibawan nga rason gikan sa akong higalang duwende nganong gusto nga tangtangon sa mayor ang chairman.

Apan nanghimakak ang mayor. Iyang giingon nga wala siyay plano nga himoong pribado ang MCWD. Hinuon iyang giangkon nga nakigkita kaniya ang representante sa Villar Group of Companies. Iya usab nga giingon nga kun ipribado man ang MCWD dili ang kinatibuk-an kun dili ang pipila lang nga kabahin sa operasyon niini.

Kagahapong adlawa sa tulomanon Super Hirit sa GMA Super Radyo DySS  giingon ni Atty. Daluz nga gipatawag ni Mayor Rama ang mga sakop sa MCWD Board didto sa iyang panimalay ug gipahibalo sa pagpribado sa MCWD. Giangkon sa abogado nga wala siya makatambong sa nahisgotang meeting apan gipahibawo siya sa gihisgotan sa meeting. Giingon ni Atty. Joey Daluz nga ang kinatibuk-an gayod nga MCWD ang himoon nga pribado tungod kay kuhaon sa Villar Group ang operasyon sa MCWD ug sila na ang magpadagan niini.

Si Rama nga nahinabi usab kagahapon sa Super Hirit mahitungod sa paggamit sa MCWD building nga Prince Warehouse kaniadto nga walay abang nagdumili sa pagtubag niini tungod kay taas kining istoryahonon.

Kinsa man ang nagsulti sa tinuod, si Mayor Mike Rama o si Atty. Joey Daluz? Unsa man gyud ang tinuod, himoong pribado sa Mayor ang MCWD o dili ? Ang pagsupak ba ni Atty. Daluz kang Mayor Mike sa plano niini nga himoong pribado ang MCWD ang hinungdan nganong gusto sa mayor nga ilisan si Atty. Joey Daluz sa pagka-chairman sa MCWD? Mao ba kini ang rason nganong nawagtangan na og pagsalig sa abogado ang mayor? Unsa gyud kaha ang tinuod?