Pataka sa ROTC
Nakugang ang mga senador sa kadako sa gasto ug kadaghan sa mga sundawo kon dayunon ang plano sa paghimong mandatory sa Reserve Officers’ Training Corps (ROTC) sa tanang estudyante sa kolehiyo. Ug kay nauwawan man sa pahinumdom nga di diay sama kasayon sa ilang sulti ang pagbanhaw sa programa, usa nila nitulisok sa tinubdan sa kasayuran.
Dako tinuod nga baligho. Sa pagtampok sa dughan pag-apura nga bansay-bansayon ang mga batan-on sa militar, nataligam-an sa mga politiko pagkonsulta ang Armed Forces of the Philippines (AFP) ug Department of National Defense (DND).
* * *
Si DND Undersecretary Franco Gacal ang nipahibawo nilang Senador Bato Dela Rosa ug kaubanan sa nataligam-an nga mga numero kon ipamugos na sab ang ROTC:
• 10,000 ka sundawo ang gikinahanglan sa pagpatuman sa programa sa 2,400 ka kolehiyo ug unibersidad sa tibuok nasud, o 7% sa tanang 143,100 ka sakop sa AFP; ug
• Ang gidaghanon sa mga sundawo nga gikinahanglan moambas og duha ka infantry divisions, 18% sa tanang 11 ka infantry divisions sa AFP, nga igong mapakatap sa tulo ka rehiyon sa Mindanao o Kabisay-an.
* * *
Sayon para sa mga senador ang pagpasalig nga gahinan og dugang kuwarta ang AFP pagpatuman sa ROTC. Ambot asa sila mangita og pundo. Kay karon pa lang gani, segun ni Senador Sonny Angara, kinahanglan nga mangutang ang gobyerno og P4.4 bilyones kada adlaw aron pagpalihok sa nagkalainlaing mga ahensiya.
Sama sa ubang nangaging mga balaudnon nga ilang napasar, ang mga sakop sa Kongreso napakyas pagpangandam sa kinatibuk-ang implikasyon. Kay sige rang tutok sa tumoy sa ilang ilong.
* * *
Kon mohunong lang kadiyot sa ilang pagarpar ug tun-an ang mga dokumento nga gisumiter sa AFP ug DND, mahibaw-an unta sa mga senador nga, bisan boluntaryo rang ROTC, dunay 330,000 ka estudyante nga nagpa-enrol.
Laing nataligam-an sa pataka sa mga senador mao ang report ni ??Col. Ronald Jess Alcudia, executive officer sa Reservists ug Retirees Affairs sa AFP ug tagduma sa ROTC: Kuwang nang daan ang ilang mga sakop nga moduma sa training sa nagpadayon nga school year sa mga kadete sa ROTC, nga 9% ra sa tanang 3.5 milyones ka estudyante sa kolehiyo.
* * *
- Latest
