EDITORYAL - Disiplina dad-on sa gawas sa balay

Lain na sab karambola nga gikalambigitan og mga kabataan ang nahitabo dili palang dugay, niadtong hitaboa didto kini sa Mango Avenue sa Cebu City diin mahimutang ang mga nagkalain-laing imnanan nga dugokon sa mga kabataan.

Nag-viral sa social media ang maong video diin nakita ang ginukdanay sa mga batan-on diha mismo sa tunga sa maong karsada duol sa usa ka bookstore.

Nakita sab sa video nga dunay usa ka batan-on nga gikuninitan sa ubang mga batan-on gipuli-pulihan og sumbag ug patid bisan kini nag-ubo na tunga sa dalan.

Gani duna pay usa nga gituohang motorista nga nagbitbit pa og helmet nga miambit sab og bukbok sa maong batan-on, walay nasayod kun kauban ba kini sa grupo sa mga namukbok o gusto lang gyud manapat bisan walay labot.

Ang talan-awon makaalarma ug makapabalaka sa mga ginikanan nga dunay mga anak nga kaparehas og edad sa mga nalambigit diha sa video.

Mas makahadlok pa gyud hunahunaon nga dunay mga walay labot nga mga tawo nga mag-apil apil og pasakit niadtong nalup-og na.

Subo sab kaayo tan-awon nga dunay polis nga misanta sa mga nangulata, apan wala makita kun dunay gipangdakop sa maong hitabo o kun nailhan na ba ang mga kabataang nalambigit.

Dunay mga balaod batok aning pagpanakit sa uban, duna say ordinansa ang siyudad pagpakgang sa mga ingon niini nga hitabo sama sa Curfew Ordinance.

Kanang paglaag-laag tinuod kabahin sa ilang patubo sa pagkabatan-on apan kinahang responsable sila sa ilang kaugalingon ug mga panghimuon diha sa gawas. Kinahanglang magpabilin ang disiplina.

Nga unta, pun-an pa ang mga polis nga magbantay aning mga lugar nga gikahimutangan aning mga imnanan ilabi na kanang paboritong adtuon sa mga batan-on diin pirmeng dunay bikilbikil bisan gamay ra kaayo ang hinungdan.

Ang kawalay disiplina sa kaugalingon ug magpatara kun makagawas sa balay posibleng moresulta sa pagkaguba sa ilang kaugmaon o ilang ikamatay.

Magsilbi unta kining leksyon sa tanan, dili lang sa mga ginikanan kondili sa mismong mga kabatan-onan.