Na-curfew ang patay

Mao kini ang nahitabo sa sitio Dakit, Barangay Guadalupe sa dakbayan sa Sugbo niadtong nakalabayng gabii diin wala pasudla ang minatay nga moagi unta sa usa ka subdivision.

Ang systema man gud sa dapit, walay laing kaagian ang mga molupyo sa sitio Dakit padulong sa ilang dapit ilabi na kong adunay mga karga kong dili sila moagi sa dapit sa mga kayahan.

Gitugotan man sila makaagi apan dunay curfew gikan sa alas 6 sa buntag hangtud sa alas 6 sa gabii.

Ug tungod kay naabtan og alas 7 sa gabii, ang patay wala na kini pasudla sa agianan.

Bisan giunsa og hangyo sa mga tagtungod, apil na ang mga homeowners, wala gyud matarug ang mga gwardiya nga nagtuman ra pud sa mando sa mga homeowners.

Naabtan og alas 12 sa tungang gabii ang patay nga naghuwat sa gawas sa subdivision.

Maayo nalang nga nibarog ang head guard ug maoy nangusog nga paagion ang minatay bahala og mataktak siya sa trabaho.

Kudos nimo guard kay mas naa pa kay kasing kasing kay sa mga opisyal sa homeowners dihang dapita.

Pwera gaba mora’g dili mga tawo nga walay pagbati sa isig ka tawo.

Kumo pobre dili nalang gyud patalinghugan ang hangyo.

Nakasulod man tuod apan gidayongan sa mga silingan ang lungon kay wala man gyud pasudla ang sakyanan sa punerarya, hilabihan ra ba ka lisod sa agianan ug layo usab ang ilang kapilya diin gihaya ang namatay.

Ang nahitabo sa minatay ang nagsilbeng pukaw sa mga opisyal sa gobiyerno nga masayod sa mas dako nga problema sa dapit kay gilisodlisod man gani ang minatay samot na ang mga buhi.

Simbako dunay emergency dili gyud kagawas ang mga tawo.

Samot na nga wala tugoti nga makasulod bisan motor man lang nga kasakyan sa mga tigulang ug pwd panahon sa emergency.

Usa na ka dekada kining maong problema nga gikinahanglan masulbad na.

Bisan og gilibotan sila sa pribadong luna apan dili na ba sila matagad sa guberno?

Mokabat sa 300 ka pamilya ang anaa sa maong dapit nga nabutang sa peligro.

Busa angayan pud silang tagdon ug iuban sa Singspore-like city.

Kaayohan sa katawhan ang tan-awon bisan kabus ug adunahan pareho ra kitang tanan mga tawo, gawas lang sa ubang adunahan nga mas tawo pa ang mga hayop kay kanila nga hinayop ang batasan.