EDITORYAL - Nakulban og kaldero
![EDITORYAL - Nakulban og kaldero](https://media.philstar.com/photos/2022/09/29/2_2022-09-29_23-29-36.jpg)
Nagkadaghang mga kompanya ang nanaktak karon og mga kawani tungod sa kalisod pagpmentinar sa kita sa ilang ilang mga produkto.
Dili palang dugay, mianunsyo ang usa ka dakong online shop nga manaktak kini og kaliboan sa ilang mga empleyado tungod sa matud pa kadako sa ilang alkanse gumikan kay mihinay ang ilang halin.
Apan gisaway sab kini sa mga netizens apil na mga celebrities sa Pilipinas tungod kay samtang mianunsyo kini nga manaktak kay ‘naglisod’, nikuha sab kini og bag-ong celebrity endorser. Husto ba kini on tinuod ba kaha ang rason sa ilang pagpanaktak?
Apan aduna say mga kompanya nga locators diha sa Mactan Economic Processing Zone ang nipahibalo nga manaktak sab sila og mga empleyado o retrenchment tungod sa krisis nga nasinati dili lang dinhi sa nasud kondili sa tibuok kalibotan.
Matud pa gibanabanang kwatro mil ka mga empleyado sa maong mga kompanya kansang produkto pang export ang mataktak gikan sa trabaho.
Pagkasakit ug makapabalaka para sa mga apektadong empleyado ang mga sama niini nga balita tungod kay human og pirma sa ilang separation, pagkasunod adlaw wala na silay trabaho ug maapil na sa talaan sa mga “jobless.”
Unsaon nalang ang mga balayrunon nga panginahanglan sa ilang tagsa-tagsa ka pamilyang nagsalig sa ilang sweldo gikan sa maong mga kompanya. Tinuod dili gyud tanan mahimong ibasol ngadto sa gobiyerno ang mga susama sa ingon niini nga mga hitaboa.
Walay kontrol ang gobiyerno sa mga panghitabo sa kalibotan ilabi na kun ang mga raw materials niini gikan pa sa mga dapit nga naapektahan sa mga kagubot o katalagman dala sa kinaiyahan.
Apan duna kini mahimo pinaagi sa pagtabang sa mga mataktak sa trabaho nga makakita dayon og kabalhinan. Unsa may aksyon nga gibuhat ang mga hingtungdang ahensiya aron mamenus-menusan ang epekto sa kinabuhi sa mga pamilya sa mga nataktak sa trabaho.
- Latest