Ang brave

Aron mahatagan og dugang gahom ang mga lokal nga kagamhanan ug mahatagan og kasulbaran ang dili balansi nga pag-apod-apod sa gahin sa nasud, gisugyot ni Senate President Vicente Sotto III ngadto sa ehekutibo ang paggakos sa bottom-up nga matang sa budgeting.

Gisugyot sa presidente sa Senado ngadto sa ehekutibo ang Budget Reform Advocacy for Village Empowerment o BRAVE, usa ka programa diin ang ehekutibo direkta nga makapagawas og salapi nga mokantidad og P5 milyon ngadto sa P1 bilyon nga local development fund (LDF) ngadto sa 42,046 ka mga barangays, 1,493 ka mga lungsod, 146 ka mga siyudad ug 82 ka mga probinsiya sa nasud.

Ubos sa BRAVE nga programa, mahimong progresibo ang ekonomiya pinaagi sa paghatag og dugang gahom sa mga local chief executive sa pagpili sa pilianan alang sa kalamboan gikan sa proyekto nga maghatag og trabaho hangtod sa inprastraktura. Dinhi ang mga kapitan, mayor ug gobernador dili na magpaabot og kaluoy gikan sa nasudnong kagamhanan.

Sa BRAVE nga programa ang kada probinsiya makadawat og tinuig nga P1 bilyon gikan sa LDF samtang ang matag siyudad makadawat usab og tinuig nga P100 milyones. Ang matag lungsod makadawat usab og tinuig nga tag P50 milyones ug ang matag barangay makadawat og tag P5 milyon. Kining maong salapi wala pa kini labot sa bahin sa lokal nga kagamhanan sa National Tax Collection ug sa ilang tinuig nga appropriations o gahin.

Giklaro ni Sotto nga sa taas nang katuigan napakyas ang ehekutibo sa paggasto sa salapi nga gigahin alang niini pinaagi sa General Appropriations Act (GAA) nga gipalabang sa Kongreso matag tuig. Giklaro ni Sotto nga adunay daghang salapi ang gobiyerno apan wala lang kini gastoa.

Niadtong tuig 2019, si Senador Ping Lacson mihikay og balaudnon sa Senado nga nagtinguha sa pagpatuman sa bottom-up budgeting.