Manny gibuksan, daghag nakit-an

Human ideklarar sa PDP-Laban Pimentel-Pacquiao’s faction nga si Senador Manny Pacquiao maoy padaganon pagka presidente sa Pilipinas para sa 2022 national election, naikag gilayon si tonitalks host Toni Gonzaga pagpahigayog usa ka interview nga giulohag: ‘Why Pacquiao Is Running for President?’

Diin, iyang gi-post sa You Tube channel.

Agi’g sugod, sama sa nagsapnay’g mahalong gasa nga pinutos og bulawan, gipailaila ni Toni sa mga viewer si Manny, kinsa nailhan na kaayo sa tibuok kalibotan.

Unya, gibuksan ni Tony ang takip sa pagkatawo ni Manny pinaagi sa pagpabuhagay’g mga pangutana bahin sa iyang boxing career, pamilya, relihiyon ug politika.

Mahitungod sa iyang boxing career, si Pacquiao mipahayag nga hingpit siyang moretiro sa pagkaboksidor kon modaog pagka-presidente sa Pilipinas.

Niadtong tuig 2015, diin lumansaray si Manny pagka-senador, siya misaad sab: nga, kon ugaling ma-senador, mopahulay na siyag pamoksing.

Pero wala kini matuman. Hain na ba ang gipangyawit ni Manny nga mahadlokon siya sa Diyos, diin ang pagpamakak, usa ka sala?

Usab misulti si Manny nga dili kuno siya materialistic. Apan ang gipangsul-ob niya ug sa iyang mga minahal sa kinabuhi nga mga hapin ug adorno sa kalawasan, labi na sa mga gamit ni Jinky, pulos luho ug mahalon.

Gisukna si Manny ni Toni kon unsaon niya pagpasabot ang katawhan niini? Si Manny mirason-pahayag: nga gi-enjoy lang kuno niya ug sa iyang pamilya ang kaadunahang naangkon gikan sa tumang sakripisyong naagian, diin gipatud-an niyag dugo’g singot.

Pamahayag nga gustong moipsot sa pagkakorner. Pero, dili makaipsot sa tiunay’ng kahulogan sa pulong ‘materialistic. Ang tawong dili materialistic, bisag unsa pa kadato, dili mahilig mosul-ob-tener og mga mahalong butang nga kalibotanon.

Kaniadto, makakaon lag pandesal, kontento na si Manny. Apan karon nga popular ug bilyonaryo na siya, ingon sa kulang pa ang gihatag nga blessings sa Ginoo kaniya. Dili siya kontentong mag-senador lang. Gusto gyod siyang mahimong presidente sa Pilipinas sunod tuig, 2022.

Kay iyang prisohon ang tanang korap sa kagamhanan.

Daghang butang ang nakit-an sa kinaiya ni Manny human buksi ni Toni ang dughan sa senador pinaagi sa maong interbiyu sa tonitalks. Kinaiyang makahatag og tamdanan kon angayan ba siya o dili sa kinatas-ang puwesto nga iyang gipangandoy?