Katagbawan

Agosto 8, 2021: Ikanapulog-siyam nga Domingo

Mga Pagbasa: 1Har. 19;4-8/Sal. 34/Ef. 4;30-5;2/Jn. 6;41-51

Kini ang gipangita sa kadaghanan kanato. Pangandoy nga unta mamahimong mabusog ug matagbaw kita sa mga butang nga atong gipanghimo adlaw adlaw sa atong kinabuhi. Mao nga sa tantong pangita sa maong katagbawan, daghanan nato ang nahitumpawak sa mga hinanaling merkado sa kalipay. Apan sa kaulahian kuwang ra gihapon ang tanan ug ang kahaw-ang anaa kanunay sa atong kinabuhi.

Apan ang tinud-anay nga katagbawan anaa lamang kang Jesu-Kristo ang tinud-anay nga pan ug pagkaon natong tanan. Anaa kaniya ang tinud-anay nga kinabuhi ug kabaskog. Ang Sagrada Eyukaristiya pagkaon dili lamang sa lawas kondili usab sa atong kalag. Kay Siya man ang dalan, ang kamatuoran ug ang kinabuhi, butang nga gikinahanglan nato aron kita mabuhi dili lang sa atong kalibutanong panaw kondili alang usab sa atong langitnong panaw.

Ning panahon sa dakong kalisdanan, mahinungdanon kaayo ang pagpalig-on dili lang sa atong kinabuhing lawasnon kondili usab sa atong kinabuhing espirituhanon labina gyud ning panahon diin nahimong idlas alang kanato ang paglaum. Unsa may atong buhaton?

1. Una kinahanglan nga mamahimong hugot ang atong pag-ampo ngadto sa Dios nga dasigon kita niya sa gihapon. Ang paghimo sa ingon makahupay man sa atong nagluya nga kalag.

2. Ikaduha, tinuod malisod ang pagsimba sa mas gawasnon nga paagi ning panahon sa dakong pandemiya. Ang makapahupay nato mao man ang paghimo sa atong espirituhanong pagpangalawat.

3. Ikatulo, nagtuo kita nga anaa ang Ginoo, dakong buhi busa angayan lamang nga sangpiton nato siya sa kanunay nga unta panalipdan kita labina gyud ning mga panahona karon. hangtud kanus-a kaha kining atong panlimbasog? Mobalik pa ba kaha kita sa normal?

Dios na lang gyud ang mag-igo. Kay ang kamatayon walay pilion bisan pa kun ikaw batan-on.