Ballistic result

Gitangtang na sa kapolisan sa dakbayan sa Sugbo gikan sa listahan sa mga posibleng mamumuno ni Ritchie Nepomuceno, kadtong nireklamo batok sa mga sakop sa Sawang Calero Police Station, si Sgt. Celso Colita human wala magtakdo ang resulta sa ballistic exam sa armas nga giingong iyang gigamit paghikog ug sa armas nga gigamit pagpatay kang Nepomuceno.

Tungod niini matud ni Col. Josefino Ligan, hepe sa kapolisan dinhi sa dakbayan, dili si Colita ang nagpatay ni Nepomuceno.

Posibleng tinuod nga inosente si Colita sa nahitabo kang Nepomuceno apan di mahimong ibasi lang ang paghukom sa nahimong resulta sa ballistic exam.

Gikinahanglan pa gihapon ang mas lawom nga imbistigasyon sama sa pagsusi sa iyang itenerary niadtong adlaw nga gipatay si Nepomuceno. Diin siya sukad 8:37 sa buntag hangtud sa alas 6 sa gabii niadtong Abril 19?

Importante sab nga ilakip sa pagsumitir sa ballistic exam ang armas sa polis nga mieskort niya alang sa tibuok adlaw gyud nga medical exam.

Mas makatabang sab paghatag og lamdag sa tinuod nga nahitabo pagsuta may kalambigitan ba gyud o wala si Colita kun susihon sa mga imbistigador ang mga CCTV sa mga duol nga establishemento.

Ang resulta sa ballistic test sa armas nga giingong gigamit ni Colita pagpusil sa iyang kaugalingon wala magprobar nga wa siyay kalambigitan pagpatay ni Nepomuceno.

Igo lang ni nagmatuod nga dili parehas ang pusil nga gigamit sa iyang paghikog ug pagpatay kang Nepomuceno.

Sama nga kadudahan sab kun si Colita ba gyud ang nanag-iya sa armas nga nakit-an duol sa iyang patay'ng lawas.

Ang mga pagduda dili mahanaw hangtud nga makumbinsir sa kapolisan nga seryoso ug wala gilamo-lamo ang pagpagigayon sa imbistigasyon.

Sa kaso sa giingong paghikog ni Colita, dili makahatag og klarong tubag ang kadagkoan sa kapolisan diin siya makakuha og armas?

Labi pa nga gikan siya miatubang og imbistigasyon nga gihimo sa usa ka opisyal. Way pulis nga giimbistigar nga tugotang magtakin og armas.

Laing makadisturbo nga kasayoran nga angayang ipatin-aw sa kadagkuan sa atong kapolisan aron malikayan ang mga pagduda mao ang pagkabutang sa armas nga giingong gigamit ni Colita pagpusil sa iyang kaugalingon.

Dunay mitumaw nga mga kasayoran nga si Colita usa ka walhon kun mas dominante ang iyang walang kamot. Apan nganong didto sa tuo niyang kamot makit-i ang armas?

Ang makuting imbistigasyon lang maoy maghatag og kahayag sa mga kalibog nga naglimin niining maong mga kaso.