EDITORYAL - Bible stories sa kabataan

Kabahin na sa ipangtudlo kaniadto sa mga nagtubo nga kabataan ang mga maanindot kaayong basahon sa Bibliya. Ang mga estorya sa Bibliya nga naghisgot sa kulbahinam nga mga kaagi nga kapunitan og moral nga pagtulon-an.

Mao kini ang gitawag kaniadto nga Bible Stories, sama sa David ug Goliat, Samson ug Delilah, Daniel ug mga liyon, ang pagpahunong ni Hesukristo sa bawod ug daghan pang uban nga nindot kaayong paminawon o tan-awon bisan sa telebisyon.

Kaniadto kugihan kaayo ang Simbahan sa pagtudlo niini, apan sa pagabot sa panahon daw nagkaanam og kawala ang bertud sa pangdani sa Simbahan sa kinabag-an sa mga kabataan, kay sa pagkakaron, mas daghan sa kabataan ang nahilig na sa mga Mobile Legends, Dota , ug daghan pang online games.

Pipila nalang man kaha gikan sa matag napulo ka mga kabataang nag-edad 10 hangtud 15-anyos karon ang nasayod aning ubang mga Bible stories? Pipila nalang sab kaha karon ang mga magtutudlong layko o katekista sa Simbahan ang paminawon sa mga kabataan diha mismo sa ilang gipuy-ang katilingban?

Dako na gyud og kausaban ang kalibotan lakip ang pamatasan sa tawo karon. Samot na ang mga kabataan nga nag-agad ug nagtamod sa kung unsay gipangtudlo sa ilang mga ginikanan ug katiguwangan diha kanila.

Tungod sa ka –busy na sa trabaho pipila nalang man kaha ka mga ginikanan ang nakahatag og panahon aron ang ilang mga anak ilang matutokan pagtudlo kabahin sa Bibliya?  Sagad sa mga ginikanan gisalig naman ang tanan ngadto sa mga magtutudlo sa eskuylahan ang pagtudlo kabahin sa relihiyon.

Apan pagabot sa balay, sukwahi ang makita sa bata sa taras ug gawi sa ilang mga ginikanan sa gipangtudlo sa ilang magtutudlo. Nakapadugang sa kalibog sa bata.

Mas grabe pa gyud ang ubang mga ginikanan nga manaway kay para nila walay gamit ang subject nga religion sa ilang mga anak.

Mao nang dili na ikahibulong karon nga kining maong mga klaseha sa ginikanan suwail ug masinupakon og mga anak. Importante kaayo kining mga Bible stories tungod nagtudlo kini sa mga bata og pagsalig, pagtahod, pagamuma, paghigugma, pagtuo ngadto sa Kahitas-an, pakighigalaay ug daghan pang uban.