Listahan

Ang listahanan kun National Household Targeting System for Poverty Reduction (NHTS-PR) usa ka sistema nga nag-ila kung si kinsa ug asa ang mga panimalay nga pobre ug nanginahanglan sa tibuok Pilipinas.

Ang pagkuha sa datos sa listahanan gipasubay kini sa upat ka hugna sa pagtuyok sa proyekto nga mao kining mosunod: una, ang preparatory phase nga gihimo niadtong Hulyo hangtod sa Septyembre 2019.

Kining maong hugna naglambigit sa pagpangandam pinaagi sa pag-hire ug pag-training sa mga field staff nga naglakip sa area coordinator, area supervisor, enumerators, encoders ug verifiers, pag ila sa mga lugar nga angay i-assess sa lugar nga nahisgotan.

Ang ikaduhang hugna mao ang data collection o pagkolekta sa datos pinaagi sa pagbisita o pagbalay-balay sa mga field staff aron sa pag interbiyu ug paghipos sa mga kasayoran sa matag pamilya gamit ang Household Assessment Form, dayon i-encode kini aron moagi sa proseso nga gitawag og Proxy Means Test.

Ang ikatulong hugna mao ang validation and finalization o ang pagplastar sa mga pasiunang ngalan o pasiunang listahan sa mga kabus sa kada barangay aron kahatagan og kahigayonan ang mga lumulopyo  sa pagreklamo kun adunay sayop nga nakita sa lista. Kaabag niini ang Barangay Verification Team ug Local Verification Committee.

Ang ikaupat nga hugna mao ang reports generation and data sharing o ang pagpagawas sa resulta kon si kinsa ug asa ang kabus nga pamilya ug paambit niining mga datos ngadto sa nagkadaiyang ahensiya sa gobyerno ug pribado aron magamit nila sa pagplano ug pagkat-on sa tukmang abag alang sa mga kabus nga ilang nailhan.

Manghinaut lang ko nga ang listahanan dili maparihas sa mga programa nga gipasiugdahan sa nasudnong kagamhanan nga nagmugna og kaguliyang sa mga tawo nga angayang makadawat og ayuda apan napadaplin ang ilang pangalan sa dili tino nga hinungdan ug ang mga nakadawat kadtong dili mga angayan.