Gidugok

Gidugok sa bagang duot sa katawhan ang pagbukas sa usa ka tindahan og sapatos diha sa may Sanson Road sa Barangay Lahug niining dakbayan sa Sugbo kagahapon sa buntag.

Sigun sa report, alas 9 ang gitakdang pagpangabli sa tindahan apan alas 7 pa lang sa buntag nagsugod na pagdasok ang mga tawo ug nag-ilog kinsay makauna pagpamili sa gibaratilyong mga parisan sa sapatos.

Sa gidaghanon sa mga tawo nga midagsa, way lalis labihan ka malampuson sa mga tawo nga nagpaluyo sa marketing sa maong tindahan.

Kinsa man tinuoy dili madani sa 3 ka paris sa sapatos sa presyo nga P998.

Apan kawang ang malampuson nga marketing strategy sa tindahan tungod kay sa wala pa sila maka huygo pagpangabli mimando na ang dakbayan sa Sugbo pagpasira nila tungod sa klarong kalapasan sa health protocols.

Ang mga opisyal sa dakbayan sa Sugbo nakugang sab nga nakakita sa bul-og sa mga customers nga midagsa.

Nunot niini dali nga girespondihan sa kapolisan ug gipapauli ang mga tawo.

Nasuta sa kagamhanan dili lang kalapasan sa health protocols ang nahimo sa maong tindahan. Nahibaw-an nga kuwang sab ni sa gikinahanglang mga permit sa dakbayan ug lakip na sa Department of Trade and Industry.

Hinaut nagsilbing leksiyon sa mga negosyante ang nahitabo sa maong tindahan og sapatos. Lakip sa inyong responsibilidad ang pagsiguro nga ang bisan unsang promotion nga inyong pasiugdahan dili makalapas sa mga lagda ubos sa nagpadayong modified community quarantine.

Ambot unsay nasulod sa utok sa mga tawong midugok sa tindahan og sapatos kagahapon. Wala gyud mosantop sa ilang huna-huna nga dili lang sapatos ang posibling ilang madala pauli sa ilang pinuy-anan kon dili lakip na ang kagaw sa COVID.

Angayang isilsil sa atong tagsa-tagsa ka alimpatakan nga samtang hinayhinay na nga gitugotan sa kagamhanan ang pag-abli sa ekonomiya, apan wala pa hingpit mahanaw ang COVID-19.

Ang pagpasagad sa katawhan sama sa nahitabo kagahapon mamahimong magsilbing pabilo sa pagsulbong og balik sa mga kaso sa COVID dinhi sa dakbayan. Wala tingali bisan usa nato ang gusto nga mobalik sa ECQ tungod lang sa atong pagpasagad.

Mao nga hinaot magbaton og kaikog ang matag-usa ug likayan nga mamahimong hinungdan sa tinakdanay. Dili nato mabuntog ang COVID hangtud nga ang tanan maghiusa pagsunod sa mga lagda nga gipatuman sa kagamhanan.