Mikatap sa social media kining mga giingong sayop-sayop sa mga modules nga gipanghatag sa DepEd ngadto sa mga tinun-an. Naputos sa pagsaway ug pagpakauwaw ang maong ahensiya gikan sa mga way lingaw nga netizens.
Niadto lang adlaw nga Lunes, Oktubre 5, gisaulog ang World Teacher’s Day, adlaw nga diin gipasalamatan sa tanan ang mga magtutudlo tungod sa kadako sa ilang natampo sa kalibotan. Nagbaha ang mga pahalipay ug pagtimbaya para kanila. Niana sab adlawa sab opisyal nga nagsugod ang klase sa public schools pinaagi sa distance learning gumikan sa hulga sa COVID-19.
Apan paglabay lang sa pipila ka adlaw, gisaway sa mga netizens ang DepEd ug ang mga magtutudlo tungod sa pipila ka sayop sa mga modules nga nadawat sa mga bata human gi-post kini diha sa social media.
Masolusyonan diay kun ibandilyo kini diha sa social media? Asay mas maayo kun gipahibawo dayon ang mga magtutudlo, prinsipal o regional director bahin sa nakitang sayop, ang netizens diay ang mokirihir?
Duna bay moral nga leksyong mapupo ang mga bata sa gibuhat aning mga nag-post ug nagbiay-biay sa DepEd?
Kun ang mga naghimo aning mga modules mga master teachers na ug ang uban may doctorate degree pa, masayop pa man gani, unsa nalay ikatampo sa uban nga kutob ra sa pagpanaway?
Gawas nga makainsulto, gitudloan sab sa mga nag-post ang ilang mga anak/tinun-an nga mawad-ag respeto ug pagsalig ngadto sa mga magtutudlo ug sa DepEd ug sa ilang modules nga gitun-an. Sayop sab nga pagtulon-an ang mapunit sa mga bata kay abi palang mao kini ang hustong paagi pagpangita og solusyon.
Gipakita aning mga nag-post nga mabaw sila og salabotan ug way disiplina ug makita kini sa mga bata.
Unsa pa man unyay interes sa bata sa leksyon kun ingon niini na ang iyang pagtan-aw sa mga modules?
Angay masayod ang tanan nga dili katungod o lisensya ni bisan kinsa nga pakauwawan ang usa ka tawo o institusyon nga nasipyat. Ilabi na kun klaro kaayo nga ang tumong dili solusyon maoy gipangita kundili usa lang ka pasundayag nga pagpakaaron-ingnong “maayong -laki.”