Dili lalim mag estranghero

Mokabat sa 16 mil ka mga locally stranded individuals ang anaa karon sa Cebu City kinsa nagpaabot kong kanus-a sila makapauli sa tagsa taga nila ka probinsya.

Tungod kay anaa pa sa estrikto nga quarantine protocol nga MECQ ang dakbayan sa Sugbo gihunong una ang pagproseso sa mga dokumento ug wala usay mga depasaherong sakayan sa kadagatan nga gitugotan nga makabiyahe.

Busa napugos gyud ang mga estranghero sa pagpundo bisan supak sa ilang kabubot-on kay wala man silay kapilian kon dili ang pagpaabot sa walay kasegurohan kanus-a sila.makabalik sa ilang gigikanan.

Sa pier uno sa syudad nagpundo kining mga LSI nga mopauli na unta sa ilang mga probinsya.

Naa man silay gipasilongan pero dakong kalbaryo usab ang ilang kahimtang kay nahurot naman ang ilang kwarta kay sa mokapin na sa usa ka buwan sila nga natanggong.

Gipamalit na nila kini sa ilang panginahanglan ilabi na nga kuwang ang ilang food supply ug ubang personal nga panginahanglan.

Dunay duha ka mga nanarbaho sa syudad isip katabang  apan gipapahawa na sila sa ilang amo busa nakahukom na silang mobalik sa Mindanao.

Ang gamay unta nilang tinigom sa pagpauli nahurot gyud intawon, duna man silay rasyon nga pagkaon pero dili usab nila makaon kay bawal sama sa baboy kay muslim man sila busa mag antos nalang sila sa gutom.

Naay usa ka LSI nga gikan sa Manila ug mopauli sa Mindanao pero kutob ra sa Cebu City ang barko.

Tanggong gihapon ug nagsalig nalang sa padala sa iyang pamilya gikan sa Mindanao nga naglisod usab.

Dili ko maka-imagine nga kapin sa usa ka buwan sa lingkoranan ra sila mangatulog, dunay mga senior citizens ug mga bata, pait gyud kaayo ang ilang kahimtang.

Panghinaut nila nga mahatagan unta og solusyon ang ilang kahimtang kay para kanila daw dili tawo ang ilang sitwasyon.

Hinuon dili lang usab ang mga LSI ang gitutokan karon sa gobiyerno busa kinahanglan nilang magsakripisyo apan hangtod kanus-a man?

Ang panahon ra gyud ang makatubag, kay ang nahitabo karon ang tanan apektado man.

Dili gyud lalim nga ma LSI karon kay gilisodlisod na gani sa dapit nga gigikanan samotan na unya inig abot nila sa ilang padulngan nga daghan ang mga atribida nga hilabihan ka judgemental.