Daghan ang nagbagulbol kay nakabasa sila sa balita nga si Mayor Edgar Labella miingong nahuman na kuno ang pagpanghatag og hinabang bugas ngadto sa mga lumolupyo sa tanang 80 ka barangay sa Dakbayan sa Sugbo.
Bisan ako gibati’g dakong kahibulong kon nganong nakaingon ang mayor niini kay sa Sitio Fatima, Barangay Apas, ang mga lumolupyo wa pa man mahatagi og bugas sa mga gitugyanan ni Mayor Labella. Kon mao man gani kini, way labot ang mga nagpuyo sa maong sitio sa hatagan.
Kon mao man gani gyud kini ang mahitabo, hangyoon lang nako ang mga wala makadawat nga agwanta na lang mo, kay ang gisaligan sa pagpanghatag wala tingali makagusto sa inyong mga dagway. Mangita na lang ta og laing paagi nga dili ta mangamatay.
Unsaon man, sa pagpangimprinta og mga Quarantine Pass kuwang ang gipa-imprinta, ug sa pagpamalit og bugas, wa gyud ayoha pagkwenta ug tingali ang giuna ang mga suod ra sa Mayor’s Information and Liaison Office (MILO).
Pero mao lay timan-i nga kon kini man ang mahitabo, dili makalimot niini ang katawhan.
* * *
Anam-anam nga nausab ang akong baroganan. Kaniadto, gusto nako nga unya na ilibkas ang Enhanced Community Quarantine (ECQ) sa Dakbayan sa Sugbo kon hingpit na gyud nga wala na ang Coronavirus Disease.
Apan karon, nahunahuna nako nga mangamatay ang mga tawo nga nagtuman sa gimando nga quarantine rules sa kagamhanan, apan naapektohan lang sila sa pipila ka tawo nga nagpabadlong, ug maoy rason nga padayong misaka ang mga kaso sa COVID-19.
Iampo nako nga karong Hulyo 16, ibalik na sa kagamhanan ang pagpabukas sa mga balay-patigayon aron nga makakita na og panginabuhian ang mga tawo.
Unsaon, magpatugatuga gani kita og deklarar pag-lockdown sa usa ka dapit, apan ang kagamhanan dili makahatag og sustento sa naapektohan nga katawhan, mas maayo pa nga dili na lang.
Kon ako pa ang opisyal sa kagamhanan, kaluy-on gyud nako ang tanan, aw gawas tingali sa mga nagpuyo sa mga dagko nga subdivisions nga pulos mga kwartahan.
Pero kay sila mga botante ug lumolupyo man sa Dakbayan sa SUgbo, angay gyud unta gihapon sila nga hatagan.
Apan unsaon, madunggan usahay nako ang ubang opisyal sa siyudad nga pakighinabian sa media, maayo kaayong manulti nga depensahan nila ang baliko nga pamaagi.
Kon sila pa kaha ang nasakripisyo, paminaw ko pwerte tingaling sabaa.
Mao man bitaw nga dili kaayo ko motagad kon ang mga kanhi opisyal mangreklamo, kay kon sila naa pa sa gahum, utro pa sila nga maghilom-hilom lang.