Trahedya panahon sa kalisdanan

Gabii sa dihang panahon nako matulog, ako unang gitan-aw ang  mga balita nga napatik diha sa Facebook account nako. Subo palandungon kay sa pagtan-aw ko pa lang maoy nisugat nako ang nahitabong pagbuto sa usa ka eroplano nga nagdala sa mga doktor, nurses, pasyente, crews ug medical supplies.

Ang maong aksidente nahitabo sa Ninoy Aquino International Airport didto sa kaulohan. Walo ka mga kinabuhi ang nakalas ug mga medical supplies ang nasunog lamang kuyog sa maong abyon. Pastilan! Nia kita sa dakong kalisdanan unya gikaluhaan pa gyud ogmga trahedya unsaon na lang!

Daw subo kaayo ang akong dughan nga nagtan-aw ning tanan. Dili lang nako tuyoon nga motulo gyud ang akong mga luha.

Bisan gani ang pagsuway og gamit sa Tik Tok app dili man makahupay sa gihambing kahaw-ang. Ang tanan nahimong distansiya ning panahona. Lisud gyud matud pa.

Apan bisan pa niini, anaa gihapon ang pangandoy nga kining tanan molurang ra gyud sa hingpit. Inig lurang niini mamahimo unta kitang lahi na kay sa naandan nato. Kun kaniadto katawhan kita nga maneguro lamang sa atong kaugalingon, unta inig kahuman niini maantigo na kitang mohunahuna sa uban ug mamahimong mga manggihatagon.

Kun kaniadto nahimo kitang mapagarbuhon, karon unta mamahimo na kitang mapaubsanon. Kay bisan unsaon pa nato og pagpagarbo atong nasuta karon nga kitang tanan, kabus ra diay atubangan sa Dios. Bisan gani ang atong bahandi o salapi dili man makapugong sa kamatayon. Ang kamatayon anaa karon sa atong taliwala nunot ning maong coronavirus.

Ayaw pugngi ang mga luha nga modagayday gikan sa imong mga mata kay paghugas lamang kana sa mga bisan unsang pagbati nga sa grasya nakabalda. Ning maong panahon karon ato untang i-set aside ang atong managlahing baroganan.

May gihambin akong pagduda ug daw sa pakyas ang tanang panlimbasog apan sama sa bul-og sa uban ako usab ingon nga lungsoranon naningkamot nga makahimo sa akong bahin ug tampo segun sa akong kahimtang sa kinabuhi.

Dako ang akong pagtuo nga kining maong kasinatian, kasinatian man sa pagpanglimpiyo diin nahimong mas hingpit ug lunsay ang atong pagsabot sa tanang mga butang.

Bisan gani ang paghikap nga kanato gidili sa kasamtangan, nagpahinumdom man nga balaanon kining maong balansayon busa angayan lamang nga buhaton nato uban ang pagtahud ug paghigugma.