Peligro sa SRP

Usa ka nagpangalan og Jasmin Misa ang midangop sa akong programa sa DySS Super Radyo Cebu GERRY AUXILIO ON BOARD SAKSI evening edition kaniadtong Sabado sa gabii Pebrero 22, 2020 tungod sa nahitabo kaniya ug sa iyang bana.

Iyang giasoy sa SAKSI nga samtang sakay sila sa iyang bana sa ilang multicab nga miagi sa South Road Properties (SRP) ilang nakita sa unahan nga may tulo ka mga lalaki nga nag estambay sa kilid sa dalan ug sa dihang natungod na sila niini gilabay sila og bas nga may sagol nga bato sa maong tulo ka mga lalaki.

Asoy sa biktima nga naigo gayod ang iyang nawong ug hapit usab mapuling ang mata sa iyang bana nga nagmaneho sa multicab.

Gipahunong sa iyang bana ang multicab ug mikanaug aron komprontasihon ang tulo ka mga lalaki nga milabay kanila. Ang duha ka lalaki nanagan samtang ang usa misuway sa pagharong sa iyang bana. Kay wala mahadlok ang iyang bana ang miharong kaniya midagan usab ug miambak sa ngadto sa dagat.

Tumong ni Jasmin sa iyang pagpatabang sa akong programa sa radyo mao nga mapaabot ngadto sa hingtungdan ahensiya sa gobiyerno ang kasinatian niya ug sa iyang bana sa ilang pagagi sa South Road Properties niadtong Sabado sa gabii.

Diha-diha akong gitawagan ang Station 6 sa kapolisan sa dakbayan sa Sugbo ug dali nilang gitubag ang hitabo.

Daghang motorista nga nakadungog sa reklamo ni Jasmin ang mitug-an usab kanako sa susama nilang kasinati-an pinaagi sa text.

Usa ka taxi driver ang mitug-an nga samtang nagmaneho siya sa South Road Properties gilabay og hugaw sa tawo ang iyang taxi unit nga miigo sa windshield. Nangalisbo gyud ang baho niini.

Gisugyot nako sa police ug lokal nga kagamhanan sa dakbayan sa Sugbo nga idili ang estambay sa SRP aron malayo sa peligro ang mga motorista nga moagi sa dalan niini.