Garbage collectors sa Cansojong way ayo

Saludo ko sa programa ni Talisay City Mayor Gerald Anthony V. Gullas Jr: ‘Basura Mo, Kapanginabuhian Ko.’ Programang nagdasig sa tanang lumolupyo sa Talisay City pagpamunit-hipos sa mga plastic nga basura. Matag kilong makolekta ilisdan og usa ka kilong bugas ug usa ka delatang sardinas. Sa mga tunghaan, school supplies pod ang iganti.

Sa miaging Pebero 12, tulo ka eskuylahan ang napremyohag 42 ka paketeng school supplies: Jaclupan Elementary School (30), Bulacao National High School (8) ug Jaclupan National High School (4). Usab ang barangay Tabunok nakadawat og 35 ka kilong bugas ug 16 ka delatang sardinas, diin si Mayor Samsam mismo ang mitunol.

Pagkanindot nga estratihiya sa pagkab-ot sa ginadamgong kalimpiyo. Damgo nga wala pasagding kutob ra sa hunahuna. Kondili, gilihok  aron mahimong tinuod.

Ang kalimpiyo sa kalikopan usa sa mga dagkong bulohaton nga gustong maangkon sa mayor. Apan subo palandungon, nga may usa ka lumolupyo sa Barangay Cansojong, Talisay City, (ngalan gipugngan) kinsa nahiubos sa mga bag-ong garbage collectors, kinsa giasayin sa ilang dapit kay layo ra kuno ang kalidad sa panerbisyo kon ikomparar sa kanhi mga tigkolektag basura.

Tiaw bay, matud pa sa maong lumolupyo, ang garbage truck nga moagi sa ilang dapit dili mahibaw-an kay wala kunoy sound or alarm call nga patingogon agig pahibalo nga miabot nang tigkolekta.

Ipagula ra niya ilang basura nga segregated na daan kon anaa na ang garbage truck sa ilang duol.  Hugawan silang mobutang og basura sa gawas. Inig abot na sa garbage truck nila ipagula, diin siyay mangunay pagkarga niini.

Dinhay higayon nga mga palwa sa lubi ug mga sanga sa kahoy ang iglalabay nilang basura. Pulos na pinutol ug binugkosan.

Naunsa ba, nga bisag may dakong espasyo pa nga makargahan ang garbage truck, gibalibaran man siya sa basurero nga dili kuno makarga ang tanan? Mao nga balikon lang.

Apan kanus-a? Sunod semana na sab? Hangtod nga mag-abot ang daan ug bag-ong mga sagbot? Haskang hapdosa sa iyang dughan. 

Ang kalinis sa Talisay City maoy kalipay ni Mayor Samsam. Unya, nganong giunya-unya man ning paghipos og basura sa mga basurero diha sa Cansojong? Husto ba kining ilang gibuhat, mayor?