Dead on arrival

Babagan sa Senado ang gilaraw nga balaodnon sa Kongreso nga maghatag og lugway nga duha ka tuig ngadto sa mga tag-iya sa buhatan pagdeterminar kon angayan ba o dili nga mahimong regular ang ilang empleyado.  Sama unya sa pasyente nga kritikal na ang kahimtang pagdala niini sa hospital, gipadayag sa ubang Senador nga ang mao unya’ng balaodnon, mahimong DOA kon “Dead on Arrival” inig abot niini sa Senado. Magpabilin gihapon nga sa-ad ang pag-undang sa “ENDO.”

NAGLISOD PAGPATUMAN

Segun sa datos sa DILG, midaghan ang mga kagamhanang lokal ang wala makatuman sa hingpit sa kamanduan paghawan sa kadalanan sa mga “obstructions.”  Mokunhod o modaghan ang mga vendors sa dalan depende sa kakugi sa kagamhanan pagpatuman sa lagda. Kon panginabuhian na sa katawhan ang hisgotan, moagwanta na man lang ang mga vendors pagsalmot sa duwa nga dakop-dakop ug tubig-tubig tali kanila ug sa kagamhanan.  Daginot pa more!

WA GIHAPO’Y AGAS ANG TUBIG

Mitudlo na ang LWUA og mga kasamtangan nga miyembro sa MCWD Board nga maoy modumala sa maong buhatan samtang wala pa’y natudlo ang Mayor nga mohulip sa mga gipangtaktak nga kanhi miyembro sa Board. Ginaingon nga wala man gani makasulbad sa krisis sa tubig ang mga permanente nga miembro sa Board, busa unsay mapaabot sa katawhan kon ang mo-asumir nga mga miyembro kasamtangan o temporaryo lamang? Padayon gihapon nga way agas! 

NABALHIN RA ANG TINONTO

Gisuportahan ni Presidente ang gilaraw nga dakong paglahugay sa Philippine National Police human mosarasay ang maong ahensya nunot sa kaulawan nga naangkon niini gumikan sa isyu sa pagrecycle sa ilang dinakpan nga drugas. Dili ba kaha moresulta lang unya kini sa pagbalhin ra sa tinonto ngadto sa laing lugar nunot sa pagbalhin sa badlongon nga pulis. Mao na’y giingon nga: “The difference is the same”!

ONE STEP AHEAD

Human sa nahitabo’ng pagpanulis sa usa ka jewelry shop sa dakbayan sa Mandaue, mipahigayon ug panagtigom ang mga awtoridad ug mga pangulo sa kagamhanang lokal sa tuyo nga mahisgutan ang angayan nga buhaton aron malikayan na ang susamang panghitabo sa umaabot. Wala ba kaha usab magtigom ang mga tulisan aron matun-an ang mga security measures nga gilaraw sa mga awtoridad? Sayod kita nga niining maong aspeto, ang motto sa matag habig sa kapolisang ug mga tulisan mao ang: “Be one step ahead”!