Ngalan maot pugngan

Makalagot. Makagisig kasingkasing. Lalim bay, 23 anyos inahan, gilugos og tulo ka dukirok, unya gidunggab pa gyod? Pagkawalay puangod! Normal pa kaha ilang pangutok?

Wala kaha sila makasuyop sa gidiling aso, hinungdan, nga gisudlag yawa ilang hunahuna? Ang nakapait, kay gipugngan pa ilang ngalan. Ngano? Kay mga menor de edad pa kuno? Protektado sa Juvenile Justice and Welfare Act of 2006 (R.A. 9344).

Kaadlawon sa Hunyo 1, samtang nag-inusarang nagbantay ang batan-ong 23 anyos nga ginang sa gamay pa niyang anak sulod sa ilang panimalay, kalit lang misulod ang tulo ka silingang lalaki ug gipulipulihag lugos sa mga mapangahason.

Human matagbaw paghangos sa kalalim ang mga hangol, nakasiyagit og pakitabang ang gilugos. Siyagit nga maoy nakapaaghat sa usa sa mga rapists pagduslak sa  tiyan sa gilugos.

Ang tulo ka manglulugos puro pa bata. Ang duha, mag-agaw, nag-edad og 15 ug ang usa, kinsa ilang uyoan, 16. Nasikop man tuod sila sa kapolisan sa Naga, pero gilain silag pahimutang.  Wala itipon sa prisohan nga gilubloban sa mga tadhang piniriso. Kay’g didto pa gisulod, ay, kuninitan gyod silag paak sa mga lamok.

Ingon niini kamapinanggaon ang palad sa R.A. 9344 nga mosapnay sa mga menor de edad nga nakabuhat og krimen. Imbes patilawon og igong kastigo, gi-baby-baby lang gihapon.

Dili man pang-disiplina ning balaora. Para pangpanglausag man intawon ni, uy! Pang-inspire to do more crimes! Mao, nga wala gyod ko makauyon niini. Unta, papason na ni sa mga bag-ong napiling Senador.

Kinse anyos? 16? Bata pa ba ni? Ning edara, ang biga sa tawo puwerting himsoga! Kamao nang mohimog baby. Gani, kadtong ilang gilugos nga 23 anyos nga ginang, delikado pag mabuntis kon adtong aktoha sa ilang pagpanglugos naatol nga very fertile ang babaye.

Isipa, unsa kalapad sa pagpakaulaw ang gihimo sa mga kriminal ngadto sa inosente? Unya, hasta ngalan sa mga nakasala pugngan, kay menor de edad pa?

Sila man mismo ang mipusgay sa kasagrado sa ilang ngalan, diin ang mga tipaka niini, delikadog matumban sa mga inosenteng wala makaila nila. Pagkadaghan pa unya sa mangatunok.

Mao nga nakaingon ko, ngalan ning mga batang kriminal, maot pugngan. Maayo man gani, hasta ilang hitsura, imantala.