Niadtong 6 anyos pa ko, hatagan gani ko’g usa ka sentabo ni Nanay, haskang sayawa na sa akong kasingkasing. May karmelitos kanhi, diin ang duha tag one centavo ra.
Ay, puwerte nang lingawa nakog sinupsop sa Señorita candy, diin ning tungora, nakita ko ang bulawanong bili sa salapi – ang tam-is gugma sa inahan ngadto sa iyang gipanggang anak.
Matud pang Jeopal, card shuffling supervisor, ang salapi mawad-ag bili kun gamiton kini para sa vote buying, pagpalit o pagnegosyog shabu, sugal, inom, babaye ug uban pang matang sa kahakog nga makaguba sa moralidad.
Kontento na siya kun makakaon kada adlaw, makasininag baratohon, makabalay’g gamay, makadimdim usahay’g serbesa gikan sa iyang minimum suweldo nga pinatud-ag malinis niyang singot. Happy na siya sa simpleng kinabuhi nga gihatag sa Diyos kaniya ning kalibotana.
Kay mag-unsa man kuno ang pagtigom og daghang salapi ug bahandi dinhi sa yuta kun ang pagbuhat sa ingon, makalaglag sa imong kalag?
Sa among trabahoan may empleyado nga giatake sa kasingkasing. Mild stroke ra tuod, pero nadugay gyud pagpaalim sa ospital.
Nakunsomo ang kinatibuk-ang maximum budget sa iyang company’s Health Care Plan. Busa, wala nay ikapalit og tambal samtang naa pa sa recuperation period dihang gipapahulay pa siya’g pipila ka bulan sa ilaha.
Nagpakiluoy ang empleyado sa among manedyer nga unta patrabahoon siya bisag wala pa sa hustong panahon kay wala na lagi siya intawoy ikapalit sa gikinahanglang medisina. Base sa medical certificate, ang petsa sa fit to work nga gipirmahan sa doktor, Hunyo pa.
Ug dili ning bulan sa Mayo, diin ang empleyado pursigido nang motrabaho. Morag napiit sa duha ka pangpang ang among manedyer. Kun pasudlon niya ang empleyado gumikan sa iyang kalooy, simbakog may mahitabo, iya kining tulubagon. Unsay iyang gihimo? Wala niya pasudla ang empleyado.
Pero sa wala pa papaulia, mga linibong papel de banko nga diha sa iyang pitaka, gihatag tanan ngadto sa empleyado aron may ikapalit og tambal.
Mga kaubang manedyer ug mga empleyado, kinsa nakasaksi ug nakabalita sa gihimo ni Boss Fil nangatandog ang kasingkasing. Kay didto ilang nakita ang tinuoray nga balor sa salapi. Ug mitulo ang mga luha nga mitunol sab sa ilang voluntary contribution.