Pagluya sa kalibotanong ekonomiya
Ang laslas sa presyo sa lana karong semanaha nanukad sa labing dako nga pagtibugsok sa presyo sa lana sa merkado sa kalibotan karong tuiga. Bisan nakabawi og diyutay ang presyo sa lana niadtong Biyernes, wa mapapas ang 7% nga pagtidlom sa presyo sa lana niadtong Huwebes.
Duha ang labing dagkong hinungdan nga gitumbok sa mga eksperto sa pagbarato sa lana: Una, ang kabalaka nga mas mograbe ang nagpadayon nga gubat sa patigayon sa China ug Estados Unidos; ug ikaduha, ang paghagba sa kalibotanon nga konsumo sa lana.
* * *
Pila ka oras human sa imong pagbasa ini, ipahibawo sa mga kompaniya sa lana ang tukmang us-os sugod ugma sa buntag, ug makapaabot na tang daan nga magkinopyahay hangtod sa kataposan nga usa ka dako sa ilang uminto.
Mao ni ang banabana sa mga eksperto sa industriya sa lana:
• Laslasan ang presyo sa krudo og P0.50 o P0.55 matag litro;
• Laslasan ang gasolina og gikan sa P0.40 ngadto sa P0.50 matag litro; ug
• Laslasan ang presyo sa kerosene og gikan sa P0.50 ngadto sa P0.60 matag litro.
* * *
Duha ka timaan nga nagpakitaay na og braso silang US President Donald Trump ug Chinese President Xi Jinping sa nagpadayon nga sabutsabot sa patigayon:
• Gidid-an nang Trump ang Google ug ubang Amerikanhong mga kompaniya sa pagpakigsawo sa ilang teknolohiya, software ug hardware uban sa Huawei, ang labing dakong kompaniya sa telepono sa China; ug
• Nipasumbingay ang China sa pagputol sa pagbaligya sa rare earths, sangkap sa electronics alang sa smartphones, electric cars ug missiles, kay silay tinubdan sa 80% sa kalibotanong panginahanglan.
* * *
Nitumaw sab ang duha ka timaan nga nakapapas sa mga pagduda sa pagluya sa kalibotanong ekonomiya ug pagtibugsok sa demanda sa lana:
• Pagsulbong sa imbentaryo sa lana sa China sa iyang kinatas-an nga ang-ang sukad sa 2011, nga timaan sa dako nga pagtidlom sa konsumo tungod sa pagluya sa ilang ekonomiya; ug
• Paglukapa sa produksiyon sa mga pabrika sa Estados Unidos sa kinaubsan nga ang-ang sud sa dul-an sa usa ka dekada, nga timaan sa pasiunang epekto sa trade war ug sa dugang paghagba sa ilang konsumo sa lana.
* * *
- Latest
