Pagpangilad og atubang

Daghan ang gitawag natong scam karong mga panahona.

Ang uban gani nila nahimong hulga sa atong seguridad.

Ang pangutana ngano man kaha? Tingali tungod kay nindot paminawon ang gitawag nilang mga pasalig.

Doble ang ginansiya sa ginagmay nga puhonan. Nahimong dali ra kaayo ang kadato kun buot hunahunaon.

Apan kun unsa kadali ang pagkab-ot sa kadato nga ekonomikanhon, ingon ana pud kadako ug kataas ang lagapak sa kapakyasan.

Ang hagit niini alang nato mao nga diha sa paghimo og mga transaksiyon dili dayon motuo sa mga pasalig labina kun maghisgot kita og pakigrelasyon. Ning maong paagi atong malikayan ang bisan unsang labad nga idalit sa maong mga ilad ug laang.

Malimbungon kaayo ang kalibutan ug dili maayo nga atong ihurot ang tanang pagsalig sa matam-is nga pahiyom sa us aka malinglahong linalang.

Busa mahinungdanon kaayo ang TRUST.

Nagpasabot kini og:

Timailhan sa iyang kamatinud-anon. Suhira kun ang iyang kinabuhi nitakdo ba sa iyang gipanulti.

Kay dunay mga tawo nga double standard ang pagpuyo nga sa ato pa daghan og nawong, daghan og takuban.

Respetoha ang imong privacy.

Dili maayo nga ang mga tinagoan sa imong kinabuhi imong ipadayag aron lamang gamiton batok sa imong kalaglagan.

Makuyaw ang paghatag og pagsalig sa tawo nga bag-ohay pa lang nimo nakaila.

Unsa man ang motibo nganong ikaw mosalig? Ikaw saligan?

Kinasingkasing ba kini o nangita ka lang og kahigayonan nga makabentaha?

Dili ba dautan ang pamintaha?

Susiha ang mga impormasyon kun sila tinuod ba o dili kay daghang mga maanyag karon retokada lamang.

Tinuod ang tawo kun  dili siya mahadlok mohatag sa reyalismong bahin sa matag kahimtang.

Dili tanan pasalig kinahanglang ipakita gyud kini sa buhat. kay daghan karon ang sa tumang kaisog mangilad sa atubang.