Walay sulod nga lubnganan

Abril 21, 2019: Domingo sa Pasko sa Pagkabanhaw sa atong Ginoo

Mga Pagbasa Buh. 10;34,37-43/Sal.

 118/Col. 3;1-4/Jn/ 20; 1-9

Ang bugtong timaan sa kabanhawan mao man ang lubnganan nga walay sulod nga patay kini tungod kay ang kabanhawan usa man ka metahistorical nga kahimtang. Bugtong mata sa pagtuo lamang ang makaingon nga nabanhaw si Jesus gikan sa mga minatay.

Ato kining gisaulog uban ang dakong kalipay ug kita mismo ang nag look forward niini kun ato na pud nga panahon. Sa atong pagpuyo ning kinabuhia sa makadaghan kita nahiagom og kamatayon. Ang kamatayon wala lang magpasabot nga nahunong ang atong ginhawa.

Ang atong kamatayon nagpasabot man pud og paglunang sa sulad sa kawalay kapaingnan. Sa laktod nahimo kitang walay tumong sa atong kinabuhi. Ang kabanhawan usa ka kasaulogan sa kinabuhi. Dili lang kay kinabuhi nga nakapahimo natong molihok ug molakaw, mosulti ug moginhawa.

Hinunoa kinabuhi kini diin anaa ang madasigong panaw padulong sa kinabuhing madagayaon, paglitok og mga pulong sa kadasig labina ngadto kanila nga nahimong biktima sa kaluya. Pagsud-ong kun unsa kanindot ang kalibutan bisan pa man kun ugaling nahimo kining laksot ug way kahulogan.

Nahimong balansayon ang salubong o engkwentro o Sugat dinhi sa ato diin atong gihatagan og bili ang panagtagbo ni Jesus ug sa iyang inahan. Nagpasabot kini sa atong tinguha nga mamahimong ulusahon ang malig-on nga baruganan ug panlantaw sa usa ka lalaki ingon man sa maamomahong pagtagad sa  usa ka babaye.

Maamumahon ang Ginoo ug ang maong pag-amoma maoy nagdapit kanato sa pagsangpit kaniya matag karon ug unya diha sa atong kinabuhi. Way sulod ang lubnganan kay dili man kita alang didto alang kita sa kinabuhing dayon. Matang sa kinabuhi nga mahimayaon, ug matang sa kinabuhi nga atong nasinati hangtud karon. Sibo ug haom gayud ang awit nga gihatagan og kinabuhi ni Monsenyor Rudy Villanueva:

“Pagmalipayon Lungsod sa Dios! nabanhaw nang Manunubos!  ngalang kanato gihalad sa Cruz aleluya! aleluya! aleluya!

May kaluwasan na ang tanan nga namatay sa Kasal-anan!  May Kinabuhi ug kabanhawan! aleluya! aleluya! aleluya!

Aleluya!!!!!!!!!!!!!!!!!

Ang bisan unsang yutan-on, sa yuta mobalik apan ang bisan unsang langitnon sa Dios makig-uban! Happy Easter kanatong tanan!