Road rage makagubot
JAV BANATI - Javier Yntig Tapulado (Banat) - March 29, 2019 - 12:00am

Kuwaresma. Init kaayo ang panahon. Mga tanom nangalaya. Mga yuta nagnganga sa kauga. Mga dam nahubsan. Wala nay tubig nga ikasuplay sa tibuok dakbayan. Pagkadaghan sa pamilya nga naapektohan. Ang uban nanghilam-os na lag usa ka botelyang mineral water. Maahat pag-report sa trabaho nga walay kaligo. Busa lawas, haskang inita!

Bisan ang dalan, nag-asoaso sa tumang kaigang. Hasta drivers nga nagmaneho sa nagkurus ug busy nga lugar, ilang ulo puwerte pong inita!

Sama niadtong gi-post sa Facebook, diin ang usa ka motorista, nanaog sa iyang motorsiklo, puwerteng sukoa kay tingali, hapit masaghiri sa SUV nga mihunong sa unahan. Giduol sa motorista ang right front seat nga bahin sa SUV ug sa bug-at butang nga gibitbit, gilambosan ang siradong bildo nga bintana. Dili kay kausa ra, o kaduha. Kondili, kadaghan hangtod napusgay-nakatag ang mga tipaka sa gikuyawang karsada.

Giablihan pa gyud sa isog ang pultahan sa atubangan aron suntokon ang sakay. Pero daling giserado sa pasahero ang palid, kinsa sa akong tan-aw nanalaw. Daw berdugong mibiya ang motorista ug misakay’g balik sa iyang motorsiklo. Apan wala pa gani siya makapaandar, gihasmagan na niadtong pasahero sa SUV, gisumbag ug gi-judo.

Wa gyud makabawos ang motorista. Kay mikalit la’g abot-abot ang mga tawo nga midugok ug gustong mobun-og niya.

Gani, may usa pa ka daw giyawaang Lolo nga nagdalag bato aron bundakan ang ulo sa motorista. Maayo na lang kay may dalagang mipugong sa tigulang ug napugngan ang iya untang pagkahimong kriminal ning panahon sa kuwaresma.

Akong kauban sa media, kinsa nailhan kong buotan ug ligdong, nakasinati sab og road rage sa dalan. Gisigehan siya’g sirbato sa pulang kotse nga naalihan ang dalan tungod sa naghuot nga mga sakyanan sa nagkurus nga dapit.

Unya, gamit ang bugalbugalong dirty finger sa sakay, daw  gidabodabohan siya’g balikas. Ay, nahayblad ang doctorate ko nang higala, uy! 

Kining mga hitaboa nagpaila lang nga ang road rage makakayo gyud sa nadisturbong mga alimpatakan. Naa goy nagpinusilay na ini. Ug subo palandungon, kay ang namatay, suod diay niyang higala. Unsaon, tinted man ang kotseng gitirahan.

Mao, nga natong drivers, kinahanglang batonan gyud ang unlimited patience diha sa atong pagmaneho kada adlaw.

ROAD RAGE
Philstar
  • Latest
Latest
Latest
Recommended
Are you sure you want to log out?
X
Login

Philstar.com is one of the most vibrant, opinionated, discerning communities of readers on cyberspace. With your meaningful insights, help shape the stories that can shape the country. Sign up now!

SIGN IN
or sign in with