Away ni Tommy ug Alcover

Napamatud-an gyud sa Ombudsman-Visayas nga may basehanan ang pagpasaka ni Mayor Tomas Osmeña og kasong paglapas sa Anti-Cyber Crime Law batok ni Konsehal Pastor Alcover Jr.

Si Deputy Ombudsman Elmer Paul Clemente miaprobar sa rekomendasyon ni Graft Investigator Jane Aguilar nga ang kaso batok ni Alcover himoan og formal investigation og patubagon siya niini.

Gawas sa kaso nga paglapas sa Anti-Cyber Crime Law, si Alcover gipasakaan pa gyud ni Osmeña og kasong Grave Misconduct ug paglapas sa Code of Conduct and Ethical Standards for Public Officials and Employees.

Matud ni Osmeña, si Alcover mihimo’g infographic post sa social media nga gidepensahan kuno sa mayor kadtong tinun-an sa Ateneo de Manila University nga nag-bully sa iyang kaklase sulod sa pansayan.

Nagtuo si Osmeña nga gusto ni Alcover nga masuko kaniya ang katawhan nga misaway pag-ayo sa gihimo sa maong batan-on.

Matud ni Osmeña nga wala gyud siya modepensa sa maong batan-on.

Wala malipay si Osmeña sa post ni Alcover sa social media nga kuno siya miingon nga wa mag-bully ang tinun-an ug gitudloan ra niya’g leksiyon ang iyang kaklase.

Pastilan, nakapapriso na ra ba si Osmeña og propagandista nga nagtumotumo og estorya nga nakaligis kuno’g tawo ang mayor, bisan og ang tinuod, mao pa gani kini ang naghatud sa ospital sa naaksidente didto sa Lapu-Lapu nga iyang naagian.

* * *

Magbaha gyud ang beer niini. Ang amigo nakong reporter misaad nga bangkahan ko niya og duha ka bucket nga beer ug pakapinan pa’g sumsoman, kon modaog si Kongresista Jonas Cortes pagka mayor sa Mandaue.

Wala pa gyud makontento si Bro Philip, gisaaran pa gyud ko niya nga dugangan niya’g laing duha ka bucket nga beer basta modaog si Konsehal Mary Ann delos Santos pagka bise mayor dinhi sa siyudad.

Apan ako sab maoy iyang pabangkahon kon mapilde ni Vice Mayor Edgardo Labella si Mayor Osmeña.

Mora’g makabangka gyud tingali kining akong amigo kay matud sa akong mga higala sa Mandaue, humot kaayo sa mga botante si Jonas Cortes. Kon demalason si Bro. Philip ug makadaog pa gyud si Konsehal Delos Santos, ubani ko ninyo kay aron dili ta mahubog.

* * *

Dia karon sa Cebu ang mga kandidato nga gisuportahan sa Hugpong ng Pagbabago ni Davao City Mayor Sara Duterte.

Ang akong amigo nga si kanhi Special Assistant to the President (SAP) Bong Go anaa na sa ikatulo sa popularity survey, ug apil siya nga ituboy sa HNP ni Sara.

Pero wala gyud moundang ang mga kritiko ni Bong Go sa pagsaway kay gusto gyud nila nga dili kini modaog.