Walay klase

CEBU, Philippines —  Tungod sa bagyong Samuel nga motadlas sa Probinsya sa Sugbo, gikanselar sa gobiyerno ang tanang klase sa mga eskuylahan gikan sa elementarya hangtud sa kolehiyo human sa panagtigom sa tanang sakop sa Regional Disaster Risk Reduction Council kagahapon.

Si Gob. Hilario Davide III mideklarar nga tanang eskuylahan tibuok probinsya walay klase tungod sa bagyo.

“Governor Hilario Davide III has announced province-wide suspension of classes tomorrow, Nov 20, 2018 for preschool to senior high for public schools” sigon sa Provincial Information Office.

Ang suspension gihimo paglikay sa disgrasya sa mga tinun-an nga moeskwela taliwala sa bati nga panahon ilabi na nga adunay mga eskuylahan nga tabukon og sapa. Sa wala pa ang mianunsyo ang gobernador, una ng nisuspenso og klase ang Dakbayan sa Danao sugod karong adlawa Nobyembre 20 hangtod ugmang adlawa Nobyembre 21 gikan kindergarten hangtod sa senior high school levels sa pampubliko nga eskuylahan.

Ang lungsod sa Bantayan ug Dakbayan sa Carcar nideklarar na usab kini og suspension sa klase karong adlawa.

“Blue alert status meaning we are waiting an impending hazard and all teams are standby,” matud ni Baltazar Tribunalo Jr. ang pangulo sa PDRRMO.

Matud niya di momenus 40 ka responders sa ilang buhatan ang andam nila i-deploy kon gikinahanglan.

Sa Cebu City, si Mayor Tomas Osmeña mi-post sa iyang Facebook page nga nagsuspenso sa klase gikan sa elementarya hangtud sa kolehiyo. Samtang sa mga tinun-an sa mga pribadong tunghaan, giawhag sila mga kontakon ang ilang mga administrador.

Ang CDRRMC  nihimo na og pre-disaster risk assessment kagahapon ug gitinguha nila ang “zero casualty” sa siyudad sumala pa ni CCDRRMO Head Nagiel Bañacia.

Gibantayan ang mga barangay nga kuyaw sa landslides sama sa Buhisan, Pulangbato, Budlaan, Binaliw, Agsungot, Kalunasan, Busay, Apas, Quiot Pardo, ug Sapagdaku.

Apil na ang Inayawan, Mabolo, Kasambagan, Cogon Pardo, Kinasang-an, Basak Pardo, Basak San Nicolas, Labangon, ug sa downtown area.

Si Talisay City Mayor Eduardo Gullas mipasuspenso usab sa tanang mga klase sa tunghaan tungod sa bagyo.

Samtang si Alvin Santillana, pangulo sa Talisay City DRRMO  miawhag sa mga nagpuyo sa bukirong mga barangay, kasapaan ug baybayon nga mag-amping.

Ang Cebu City Bureau of Fire Protection gibutang mimandoan ang ilang mga substations nga magpatrolya aron makaresponde dayon kon may mahitabo sumala pa ni Cebu City Fire Marshall Noel Nelson Ababon.

Sa laing bahin, si Lt.Junior Grade Michael John Encina  ang tigpamaba sa Coast Guard Central Visayas nagkanayon nga gipaandam na nila ang ilang sea assets sa Hagnaya, Danao ug Bantayan island nga naglakip sa 16 Aluminum boats, duha ka rubber boats ug duha ka fast boats.  Atol sa meeting kagahapon sa Office of Civil Defense si  PAGASA-Mactan Weather Specialist Al Quiblat nibutyag nga ang Tropical Depression Samuel magdala og daghang ulan ug baha sa Visayas ug Mindanao.

Gipaabot hinuon nga mohinay kini pagtugpa sa Mindanao apan ug laing landfall sa Bohol ug Metro Cebu.

Gikanselar na usab ang mga biyahe padulong sa Leyte, Bohol, Southern Leyte, Biliran, Southern Samar,Misamis Oriental, Camiguin ug uban pa.

Matud pa ni Encina adunay1,206 ka mga pasahero ang nangatanggong sa mga pantalan sa Cebu ug Bohol, 38 ka rolling cargoes, 36 ka vessel, walo ka motorbanca, 16  ka barko g tulo ka motorbanca ang nanago.

Si Nedz Salitrero sa PAGASA–Mactan miingon nga alas-5 kagahapon nikusog ang bagyo ug giisa na ang Signal 1 sa Cebu, Bohol, Camiguin ug uban pang maagian sa bagyo.

Ang bagyong Samuel nagdala og hangin nga 55km kada oras ug haguros nga 65km kada oras samtang nag-irog kini sa gipaspason nga 25km  kada oras. Ang maong bagyo uwahing nasigpatan kagahapon sa alas -5 sa hapon gibanabanang 505km sidlakang bahin sa Hinatuan sa Surigao del Norte.

Sa pikas bahin, ang  Visayan Electric Company mo-deploy sa ilang  feeder patrollers karong buntag aron mosusi sa mga nakasagabal sa ilang mga linya. Mopatuman usab sila og 12-oras nga  shifts sa 12 ka emergency crews aron maatiman dayon kon may mga matumbang mga poste.

Giawhag nila ang publiko pagtawag daon sa ileng VECO Customer Hotline 230-8326 o sa official VECO Facebook ug Twitter pages kon dunay mahitabo sa mga linya sa ilang kuryente. - Decemay Padilla, Gabriel Bonjoc ug Rowena Capistrano (BANAT NEWS)