Tay Digong, sakita sa imong gisulti, uy!

Bisag wala ka pa makadesider nga molansar pagka Presidente sa Pilipinas, kutob sa mga tag-iya’g tindahan sa dalan Colon nga akong masudlan, akong giingnan nga kon modagan ka  pagkapangulo, segurado gyung modaog.

Sagad nila, dili motuo. Maglisod kuno ka! Apan ako silang gisultian. Kusog kaayong ugong sa mga tabitabi sa kinabag-an nga ikaw  maoy lang ituboy ug suportaha’g toda hangtod modaog.

Ug misayaw sa kalipay ang tibuok Rodrigo R. Duterte diehard supporters dihang sa kataposang adlaw, misang-at ka’g Certificate of Confirmation for Presidential Candidacy, diin ang mga t-shirts, flyers ug banners nga may markang Change is Coming mikiaykiay sa kahanginan nga giisa sa katawhan, kinsa gutom ug uhaw na kaayo sa bag-ong kausaban nga hagbay nang gipangita sa mga kasingkasing nga linupigan.

Abi nimo, Tatay Digong, ultimong kinapobrehan nga nagkamang sa yuta, migamit og  used Manila paper o ubang matang sa papel nga masulatan og ‘DUTERTE KAMI’ timaan nga bisan walay silay ikapalit og materyales sa kampanya, sila nagpakanaad timaan nga ikaw ilang gimahal.

Gani, kutob sa mga foul language o pamalikas nga manggawas sa imong baba, diin maoy himoong dakong isyu sa taga oposisyon paglumpag sa imong kalig-on, ang tanang supporters nimo naningkamot sa pagsagang sa mga hait pulong nga ilang gisaliyab tumong nimo aron dili magkahugaw ang malinis nga kawsa nga nagpaluyo sa imong pagkahimalikas.

Resulta, midaog ka pinaagi sa landslide votes. Kinabag-an sa mibotar nimo, mga Romano Katoliko, kinsa mituo nga kutob sa unsay naa nato, mabahandi man kini, life trials, illness and whatever we possess, these are all blessings coming from God.

Bisan kanang paghingan nimo sa mga Santos og gago ug lasinggo (palahubog), blessing gihapon kini gikan Niya. May purpose ang Ginoo nganong gihatag ni Niya nimo. Aron kaming nagpangga nimo, Tatay Digong, manguhit nimo ug motug-an nga kon unsa ang kasuko ang imong gibati pagsaway sa mga Santos, ingon ana sab  kasakit ang among na-feel gumikan sa imong pagtamay kanila.

Kay ang pagpamalikas-saway sa mga Santos dili ikahimuot sa Ginoo. Ug dili mi buot nga kasuk-an ka, Niya, because this is the way how we love you, Tatay Digong.