Nangiwit pero sikat?

Matud pa nga sa mga popularity survey, nangiwit kuno si kanhi Special Assistant to the President nga si Bong Go.

Apan nahibulong ko kay kon tinuod man nga si Bong Go nangiwit sa survey, nganong tuyoon man gyud sa ubang komentarista nga atakihon ug dauton ang sinaligan ni Presidente Duterte?

Mora na man hinoon og nahisama si Bong Go sa usa ka hinog ug tam-is kaayo nga prutas nga daghan kaayo ang nagsige og bato, aron nga kini matagak ug ilang kapahimuslan.

Magduda lang ko niining mga nagsige og daot ni Bong Go.

Apan nganong nangiwit man kuno sa survey si Bong Go, nga kon mobisita siya sa bisan asa nga dapit sa nasud, punsisokan ug gakson man gani siya sa mga tawo? Karon, nahibaw-an na nako.

Sa mga survey diay, ang mga tawo gihatagan og lista nga pilian nila kon kinsa ang gusto nilang mahimong kandidato pagka senador.

Daghan ang wala makaila sa ngalan ni Bong Go.

Ang tinuod nga ngalan ni Bong Go mao ang Christopher Lawrence Tesoro Go.

Karon, kinsa man tawon ang makaila nga mao kana si Bong Go?

Mao diay nga iwit siya sa survey apan kon mosuroy, pinangga kaayo sa mga tawo.

* * *

Balikon nako nga matinabangon kaayo kini si Bong Go bisan og wala pa siya mahimong Special Assistant to the President (SAP). Marso 2015, mayor pa sa Davao si Rodrigo Duterte, ug si Bong Go maoy iyang executive assistant.

Ang akong maguwang naadmit sa Southern Philippines Medical Center (SPMC) sa Davao City, ug sulod sa tulo ka adlaw nga diha ra gyud gihapon kini sa emergency room, wala gyud ibutang sa heart center ang akong maguwang bisan og may problema kini sa kasingkasing niadtong higayona.

Pagkasayod niini ni Bong Go, siya mismo ang nagpabalhin sa akong maguwang ngadto sa Intensive Care Unit (ICU) ug naatiman gyud tawon ang akong maguwang.

Walay bayad bisan og usa ka sentimo, ug gipadad-an pa og daghang tambal sa iyang paggawas.

Kini maoy rason nga gusto ko nga si Go mahimong senador kay sinati nako ang iyang batasan nga motabang gayud sa pag-atiman sa atong panglawas.

Kana maoy rason nga siya maoy nangunay sa pagdumala sa Malasakit Program ni Presidente Duterte dihang diha pa siya sa Malaca?ang.

Unya, nganong duna may mga radio announcers nga kanunay’ng modaot kang Go?

Kamo na la’y himo og konklusyon niini.