Spirit of the glass

Maghinangat na gani ang Adlaw sa mga Minatay, di lang tuyoon, mahinumdom gyud ko niadtong spirit of the glass nga gibuhat namong magklasmet sa 3-B third year high school sulod sa mangitngit namong PMT room.

Pasado alas 6:00 na kadto sa gabii, dihang nagkasabot ming lima, tulo ka babaye ug duha ka lalaki nga mosulay pagpahigayon og Spirit of the Glass. Gikan sa kandila, posporo, baso  ug hangtod na sa  kartolina nga gisulatag mga letrang A to Z ug mga numerong 0 to 9 nga gipormang lingin libot sa kartolina, lakip na ang mga pulong YES ug NO, kining tanan naandam na. Busa dali ra kaayong nahikyad ibabaw sa lamesa nga among gialirongan.

Una, nagdagkot mi’g kandila, unya nangadyeg Our Father, Hail Mary ug Glory Be. Dayon, sa among hunahuna, iyahay mig sangpit sa tawong patay na ug mihangyo nga ang iyang espiritu maoy mosulod sa gikulob namong baso.

Ang tuong tudlo namong lima gipatong sa lubot sa baso samtang nagdungan pagpangutana: “Are you in?” Taudtaod, gikulbaan mi kay ang baso milihok. Unya miirog ug mihunong sa ‘YES’. Dihadiha, among gisukna: “May we know who are you?”

Dinhi, miaginod na pud ang baso, diin mourong sa matag letra nga moporma’g kompletong pulong. Usa namo, maoy tiglista.  Ug dihang gidikit namo ang tanang letra nga gihunongan, among nasayran nga ang espiritu diay ni Lolo Karpo, kanhi sikat nga artista sa radyo, maoy naa sulod sa baso.

Aw, misunod dayon ang pusotpusot namong mga pangutana ngadtong Lolo, diin gitubag niya tanan. Basta, kay nahibaw-an lagi namo, kinsang estudyanteha ang nanguyab sa guwapa namong titser, kinsay mga ngalan sa uyab sa among classmates ug kinsa nila ang magkadayon pag-abot sa tukmang panahon? May gusto pa unta ming masayran, dihang...

Mokalit bitaw nag kapalong ang tanang kandila dungan sa  bugnaw kaayong hangin nga mihuyop sa among tingkoy, diin hasta switch sa suga nga among gipindot, wala gyud mosiga, haskang alibwaga namog panagan! Sukad niadto, wala na gyud mi mousab.

Ang ako lang nahibudngan mao: kadtong gitug-an sa Spirit of the Glass nga manag-high school sweetheart nga magkadayon, natinuod gyud. Ug nahimo pang haruhay ang ilang pamuyo.