Pwersa sa kadagatan

Mibisita sa Sugbo ang Royal Brunei Navy Warship alang sa usa ka joint exercise isip kabahin sa pagpalig-on sa pwersa sa masig ka teritoryo sa Pilipinas ug Brunei.

Anaa kini nidunggo sa adwana luyo sa Malacañang sa Sugbo tapad ra sa BRP Andres Bonifacio sa Philippine Navy nga gikan pa sa kaulohan.

Nahatagan ako og kahigayunan nga makasulod sa duha ka warship diin una nakong nakita ang sulod sa Andres Bonifacio.

Dili kabintahaan ang mga kagamitan niini isip usa sa mga elite warship sa Philippine Navy.

Aduna kini katakus sa pagpakig-asdang sa kahanginan ug bisan na ilawom sa kadagatan.

Dili lang sa panggubatan, makita usab ang ubang pasilidad sa kalingawan ug paugnat sa kusog, lutoanan ug pahulayanan.

Hamugaway kaayo ang ilang kahimtang samtang anaa sulod sa barko.

Sunod nakong nasulod ang Royal Brunei Navy Warship diin makita gyud ang dakong kalainan.

Mas moderno ang ilang kagamitan diin sa pagsulod pa lang murag anaa ka sa mini-hotel lobby.

Samot na ang ilang navigational operation center o bridge diin digital na tanan.

Mas high tech ang ilang mga armas ig-gugubat.

Taliwala pa man sa kalahian sa kahimanan apan dili palupig kon katakus na ang hisgutan sa atong mga sundalo sa kadagatan.

Mahitabo ang joint exercise tali sa Brunei kada duha ka tuig aron magpaambitay sa katakus nga magamit sa pagpalig-on sa pwersa.

Lakip sa ilang gitutokan ang pagresponde sa mga katalagman apan anugon lang kay wala maapil sa ilang schedule ang nahitabo sa Siyudad sa Naga.

Unta nasulayan ang ilang katakus sa tinuod nga disaster dili sa simulation exercise lang.