Tira pasagad

Gibanhaw ni Interior Secretary Jonvic Remulla ang dugay nang patay nga isyu mahitungod sa paghatag og gahom sa kapolisan nga mohimo og inspection sa panimay sa mga lisensiyadong tag-iya og armas.

Kini aron kuno masusi ug masiguro nga ang mga tag-iya og pusil dunay luwas ug klarong butanganan sa ilang armas nga dili makuha ni bisan kinsa.

Ang sugyot ni Remulla nunot ni sa mga nahitabong pagpamusil sulod sa mga tunghaan didto sa Tacloban ug Zamboanga nga naglambigit og mga menor de edad.

Dia na sab ta aning tira pasagad nga paagi pagsulbad sa problema.

Kinsa bay tag-iya sa mga armas nga gigamit sa pagpamusil didto sa Tacloban ug Zamboanga? Dili ba pulis may tag-iya sa armas nga gigamit sa estudyante nga namusil didto sa Tacloban?

Didto sa Zamboanga, dili ba Customs police man sab maoy tag-iya niadto? Sa ato pa pulos gobyerno ang tag-iya sa mga armas nga gigamit sa school shootings.

Unya nganong ang mga civilian man nga mga lisensiyado ang gipunterya ni Remulla?

Mao ni nakadaot sa atong mga opisyal sa gobyerno nga mas dako og baba kay sa ilang utok.

Ang sugyot ni Remulla nga tugotan ang kapolisan nga susihon ang mga panimay sa mga tag-iya og armas dugay na nga gibasura sa Korte Suprema.

Gi kwestiyon kaniadto sa grupong ProGun ang tinguha nga ilakip sa implementing rules and regulations (IRR) sa R.A. 10591 o ang Comprehensive Firearms and Ammunition Regulation Act ang paghatag og katungod sa kapolisan nga mohimo og inspection sa panimay sas mga tag-iya og armas.

Apan matud sa Supreme Court niadtong 2019, kalapasan ni sa Article III Section 2 sa Constitution nga nagprotehir sa publiko batok sa dili makiangayon nga “search and seizure”.

Kun buot sa kapolisan nga mohimo og inspection sa panimay sa mga tag-iya og pusil kinahanglan sila nga mangayo og pagtugot sa hukmanan pinaagi sa pagkuha og search warrant.

Giklaro sa Supreme Court nga dili mahimong ibaliwa ang katungod sa tawo nga gigarantiya sa batakang balaod tungod lang kay siya mikuha og lisensiya sa armas.

Inay initan ang mga civilian nga nanag-iya og armas, mas maayo tingali nga tutokan ni Remulla unsaon pagpalambo pa sa disiplina sa mga awtoridad nga ubos sa iyang ahensiya aron malikayan nga masubli ang nahitabo sa Tacloban.