Pag-usab-usab sa kasaysayan
Ambot kapila si kanhi Senador Juan Ponce Enrile kinahanglan nga mosuway pag-usab-usab sa kasaysayan sa martial law una mahimutang ang iyang tanlag sa pagpatin-aw sa lang-og niyang papel isip usa sa labing bangis nga berdugo sa diktadura ni anhing Ferdinand Marcos.
Dihang siya pa ang sinaligan ni Marcos, niinsistir si Enrile nga tinuod ang pagpamanhig niya niadtong 1972 ug nga mao to ang usa sa nakapakumbinsir ni Marcos sa pagdeklarar og martial law.
Apan dihang nibalitok siya batok ni Marcos niadtong 1986, si Enrile mismo ang nikumpisal nga peke ang pagpamanhig niya.
* * *
Human niya gikasungi ang ubang mga haligi sa People Power Revolution, sama nilang anhing Presidente Cory Aquino ug kanhi Presidente Fidel Ramos, giusab ni Enrile sa makausa pa ang iyang bersiyon sa kasaysayan.
Sa iyang libro nga “Juan Ponce Enrile: A Memoir” nga namantala niadtong 1972, niinsistir si Enrile nga tinuod ang pagpamanhig ug ang pagsuway pagpatay niya ug nga, dihang iyang gipahibawo sa panghitabo human siya nidangop sa Kampo Aguinaldo, labihang sukoa ni Marcos nga nibalikas sa iyang mga kaatbang dayong deklarar sa martial law.
* * *
Sa iyang libro, niasoy si Enrile nga niadtong Septiyembre 22, 1972, ang iyang convoy nga may tulo ka sakyanan girakrakan sa armadong mga tawo sa Wack Wack Subdivision samtang mopauli na unta siya sa Dasmarinas Village gikang nagpahibawo sa kadagkoan sa militar sa pagpatuman sa martial law.
Apan ang iyang libro gisukwahi sa bantogang mga peryodista nga nakahinabi niya, apil nilang Raymond Bonner sa New York Times, Sandra Burton sa Time, Katherine Ellision nga nakadaog sa Pulitzer ug ang National Artist nga si Nick Joaquin.
* * *
Ang pag-usab-usab ni Enrile sa paghulagway sa diktadurang Marcos, agad sa direksiyon sa huros sa hangin sa politika, nisukwahi sab sa aktuwal nga kasinatian sa pagkabilanggo sa labing inilang mga biktima sa martial law nga buhi pa.
Nisukwahi sab sa kasinatian bisan sa mga Sugbuanon nga wa moapil sa bisan unsang pakigbisog batok ni Marcos.
Pipila nila nabiktima sa pagpangilkil ug pagpanggukod sa negosyo ginamit ang photocopy sa Arrest, Search and Seizure Order (ASSO) nga pinirmahan nang daan ni Enrile ug nakapapriso nila sa way tukmang gidugayon bisan way kaso.
* * *
- Latest
