Mga tanom nga pang-abog sa lamok (2)

Basil — Usa kini ka matang sa lamian nga herbs, nga daghan og kaayohan nga mahatag. Mahimong gamiton sa pagluto. Apan ang mga lamok, dili makasugakod sa baho niini (aroma) kay makahilo kini alang sa mga dangan, o manuslokay nga insekto.

Rosemary — Maayo kini nga gamitong panimpla sa mga linuto ug gamitong sagol nga pahumot sa lana (oil), losyon ug sabon kay kini epektibong pang-abog sa lamok, mao nga gipalabi nila kini nga isagol sa mga produkto nga pampagwapa, samtang proteksyon usab kini nga dili maduol og mga insekto, sama sa lamok. Ang rosemary adunay antioxidant nga mopagana pagbalik nga patuboon ang buhok, sumala sa Nonverbal Learning Disorder Association (NLDA).

Mga lamas sa pagkaon — sama ra kini sa mga hibla (herbs). Hinoon, panagsa ka ra nga makakita og presko niini nga nakadisple sa estante kay sagad niini, ipamitay mga pinauga. Sagad sa lamas, mga natural nga pang-abog sa insekto (natural insect repellent). Sayon ra kini itanom ug patuboon sa imong harden.

Sage — Daghan ni’g kagamitan, mahimo nga sagol, o panimpla ingon man pahumot sa linuto, ug tanom nga pang–abog sa lamok. Mabuhi ni og pipila ka tuig una mailisan.

Clove — Mahimo nga direktang isambog, o isagol sa ‘baby oil’. Mahimo sab ning panimpla sa pagkaon (food seasoning) ug nagbaton sab ni’g hiyas nga makapaalibyo sa balatian. Gigamit ni nga pawagtang sa sakit sa ngipon, segun sa inpormasyon gikan sa ‘Alternative Medical Treatment’ sa Princeton University.

Lemon thyme — Sa tanang panahon, tig-init o tigtugnaw, moalibwag ang mga lamok sa  kahumot, o baho’ng citrus sa lemon thyme.

Magamit sab ang mga bulak niini, isip pagpalami sa sud-an o ubang mga potahe.