Hipos sa mga estambay

Miarangkada na ang lakang sa otoridad paghipos niadtong mga estambay gikan sa kadalanan.

Kabahin kini sa paghingusog sa kagamhanan sa kampanya batok sa ilegal nga binuhatan sa tibuok nasud, ilabina sa negosyo sa druga.

Didto sa kaulohan, sobra sa 7,000 ka tawo, daghan kanila naghukas nga nagbagdoy sa kadalanan, ang gisita sa kapolisan sa unang semana sa implementasyon sa kampanya batok sa mga estambay.

Dinhi sa Central Visayas, sobra sa usa ka libo na ang gisita sa kapolisan tungod niini. Hinuon wala sila gisikop ug gibuhian human sa pipila ka gutlo.

Daghan ang misuki niining palisiya nga naghipos sa mga naglatagaw sa kadalanan, ilabina niadtong mga walay trabaho kinsa tuyo lamang nga magbagdoybagdoy ug mangita og kainom.

Matud nila, unang ang-ang pa lamang kini sa plano sa kagamhanan nga modeklara og martial law sa tibuok nasud.

Apan mura og overacting ra usab kining ubang sektor, ilabina ang mga militante ug anaa sa oposisyon, sa ilang pasiatab kabahin sa martial law.

Wala man siguroy dakong rason ang administrasyon ni Duterte nga moliko ngadto sa pagdeklara og balaud militar.

Walay dako nga problema ang gobiyerno nga naghatag og dakong peligro sa seguridad sa nasud. Ug hinanggaw nga desisyon alang sa gobiyerno kon ang kasamtangan nga sitwasyon motukmod pa niini pagdeklara sa balaod militar.

Sa akong nakita, kabahin hinuon kining kampanya batok sa mga estambay sa lakang sa kagamhanan batok sa kriminalidad.

Kay kon walay mga magbagdoybagdoy sa kadalanan, dili ikalimod nga mapugngan gayud ang krimen.

Maayo man usab hinuon nga madisiplina kining mga estambay. Kini aron nga makaamgo usab sila nga dili gayud sila moasenso kon anaa lamang sila pirme magyampungad sa kadalanan.

Mas maayo nga angay lamang sila nga hiposon kay sa maghatag pa sila og puwerhisyo sa katilingban.