Naguol ang taga probinsiya pagkabasa sa balita nga tungod sa kasuko ni Mayor Tommy Osmeña nga wala paparkinga sa tagdumala sa V-Hire Terminal sa Barangay Kamagayan ang sakyanan sa Barangay Mayor’s Office, gusto unta niya nga pasirad-an.
Mirason kuno ang tagdumala nga para lang sa V-Hire ang maong lugar. Aw, puwerteng hayblara sa mayor. Dihadiha, sama kahait sa kilat, mimando dayon nga ipasira ang nahisgotang V-Hire Terminal.
Paita! Sa away nilang Mayor Tommy ug sa V-Hire Terminal management, ang mga tag-iya sa sakyanang V-Hire ug linibong pasahero matag adlaw ang maapektohan! Ang naandang rota nga ila na nga gihigugma ug gidumdom, kalit lang mahanaw?
Asa na man lang sila mopaingon? Ang naanad mouli kada adlaw didto sa probinsiya kay gustong modulog ni misis kada gabii, makapauli pa kaha? Pastilan, kaluoy sa ilang kahimtang kon walay tawo nga modupa aron maoy mahimong taytayan nga modugtong pag-usab sa nagubang maayong relasyon.
Sa habig ni Mayor Tommy, ako nakasabot. Sakit gyud tinuoray kon ang kauban nimo sa buhat mihangyo nga moparking sa dapit nga gipanag-iya sa gobiyerno, unya balibaran. Unta, sa habig sa tagdumala, never say never. Or, say ‘No’ in a very affirmative way aron walay kasingkasing nga masilo. Kinahanglang accommodating gihapon ta diha sa gipakita natong pagpamalibad.
Meaning, willing ta mopaparking, pero wala pa may maparkingan, Sir, uy! Di ba, mas bugnaw paminawon? Kon dili lang mahariharion ang approach, tingali, wa gyu’y Tommy nga masuko.
Maayo gani, kay si Gob. Jun Davide, tapus makabasa sa maong bad news, mitawag dayon ngadto ni Mayor Osmeña ug mihangyo nga dili lang unta ipadayon ang pagsira kay luoy intawon ang linibong pasahero, kinsa maoy maapektohan.
Nakita ni Davide ang kahasol sa kalbaryo nga iali unta ni Osmeña diha sa inadlaw nilang pagpanikaysikay batok sa kawad-on, diin ang kadali ra gyud nga nakatando ni Mayor Tommy sa giyangungo ni Jun.
Gumikan niini, dili lang ang mga pasahero ug tag-iya sa V-Hire ang nangalipay, kondili, hasta ko. Kay kon unsay nakit-ang after effect problem sa gobernador, nakita pud nako.
Dinhi gimatuod, nga estrikto man tuod si Mayor Tommy, pero may kasingkasing siya nga kaantigo maluoy.