Mayoriya na ang BOPK

Gipaabot nga may bag-o na nga mayoriya ang konseho sa dakbayan sa Sugbo human sa Barangay ug Sangguniang Kabataan elections kaniadtong Lunes. Kini human midaog ang 49 ka kapitan nga kaalyado sa pundok ni Mayor Tomas Osmeña, ug 31 lang ang nakalusot sa mga kandidato nga suportado sa partido ni kanhi mayor Mike Rama ug PDP Laban.

Akong giingon nga mayoriya na ang mga kaalyado ni Mayor Osmeña sa konseho kay ang pagpili og presidente sa Association of Barangay Councils ug federation president sa Sangguniang Kabataan (SK) usa ka numbers game, o padaghanay og kaalyado.

Niini karon nga 49 ka kapitan mga kaalyado sa mayor, segurado na nga makuha sa kampo ni Tomas ang duha ka lingkoranan sa konseho sa dakbayan sa Sugbo nga gireserba para sa presidente sa ABC ug SK.

Tungod niini, dali na unya ug wala na’y sagabal sa Mayor ang pagpalusot sa iyang mga plano, o laraw bisan pa og unsaon sa pagpangugat sa minoriya sa konseho, gawas lang kon mokiha sila ug makapagawas ang hukmanan og kamandoan nga magpugong sa gihimo sa mayoriya.

* * *

Ngano man kaha nga napilde man ang mga kandidato sa pagka kapitan nga kaalyado ni kanhi mayor Rama? Unsa man, nalupig sila sa kuwarta nga gipabaha sa ilang kaatbang sa milabay nga piniliay?

Posible ba nga mitoo ang mga tawo sa gipakatap nga black propaganda sa ilang mga kaatbang sa piniliay? Ang usa sa mga sinaligan ni Rama nga si Konsehal Joy Pesquera, nga usa usab ka abogado, naglaraw sa pagpasaka og kaso batok ni Mayor Osmeña. Kini tungod kay mao kini ang iyang gidudahan nga utok sa pagpakatap sa black propaganda batok sa mga kapitan nga kaalyado ni Rama. Pero para kanako, wala na kini pulos ug naglangay lang sa iyang panahon si Pesquera.