Mga diktador ug ICC
Tinuyo o dili, gilumbay ni Presidente Rodrigo Duterte ang iyang kaugalingon uban sa duha ka diktador sa iyang paggawas sa International Criminal Court (ICC).
Sukwahi sa iyang gipaabot nga maglumba ang ubang kanasuran pagsunod sa iyang pagbiya, nagpabilin ug nagtinguha sa mas pagpalig-on pa sa ICC ang kinabag-an sa kanasuran sa kalibutan.
Ang bugtong nasud nga nibiya sa ICC gipangulohan og diktador nga nagtinguha sa pagpabilin sa gahum hangtud sa iyang kamatayon.
Diktador sab ang nagdumala sa laing nasud nga nisuway pagbiya, apan napilde sa piniliay maong nahibalik dayon sa ICC.
* * *
Dili si Duterte ang unang nangampanya batok sa ICC. Ang African Union (AU), kahugpongan sa tanang 55 ka nasud sa African continent, nipasar og resolusyon niadtong Pebrero 1 sa niaging tuig pag-awhag sa iyang mga sakop sa pagbiya sa ICC.
Sa dakong sagpa sa liderato sa AU, wa’y nasud nga nituman sa resolusyon. Nisangpot hinuon sa pagpangampanya sulod sa AU sa paghimong mas epektibo sa ICC batok sa labing bangis nga mga krimen.
Dili makapakugang kon mao sab ni ang dangatan sa bag-ong kampanya nga gilusad ni Presidente Duterte.
* * *
Ang unang diktador nga susama og panghunahuna ni Duterte mao si Presidente Pierre Nkurunziza sa Burundi, kinsa nakabanos sa gahum human sa gubat nga nipatay og 300,000.
Sama ni Duterte, nabantog si Nkurunziza sa pakighugoy-hugoy sa kasarangang mga molupyo.
Apan human nibiya sa ICC, gigukod niya ang oposisyon ug ang media, gilibkas ang limitasyon sa termino, gikoronahan sa titulo nga “eternal supreme guide” ug nangampanya pag-usab sa piniliay aron makapabilin sa gahum hangtud sa kamatayon.
* * *
Ang laing diktador nga nibiya sa ICC mao si Yahya Jammeh nga nihasi sa Gambia sa niaging 22 ka tuig. Gibungkag niya ang oposisyon, gihasi ang media ug gipatuo ang katawhan nga makaayo og AIDS ginamit lang ang iyang mga kamot.
Dihang nagdumili pagdawat sa iyang kapildehan sa piniliay niadtong Disyembre 1, 2016, gihulga siya sa silingang mga nasud sa Africa nga magpadala og kasundalohan pagpalayas niya ug gibiyaan sa iyang gabinete ug kadagkoan sa militar.
Napugos siya pagkanaog sa gahum, ug kay nibalik na man ang Gambia sa ICC, kapaninglan sa tanan niyang gipamatay ug gipangawat.
* * *
- Latest
