Pagkaong pahimsog sa utok (3)

* Liso sa kalabasa nga pula — Nagbaton kini og daghang makapabaskog, partikular para sa kahimsog sa utok. Sama sa Zinc, kon kulang kita niini, mosangpot sa kadaot sa utok, nga kalagmitan mahimong malimtanon ug maango-ango.

* Magnesium —Esensyal ni sa utok para dali makasabot ug makakat-on, nga molantip ang salabotan.

* Iron —Gigamit sab kini sa utok aron pagkontrolar sa signal ngadto sa pino nga kaugatan.

* Dark chocolate — Dili kanang sinagolan sama sa gatas o ubang ‘fortified flavor’. Kinahanglan nga puro gyud cacao nga kolor tableyang lagumon pagka-brown. Ang tsokolate, makapalig-on usab sa memorya, nga santaon niini kanunay ang mga elemento nga mopahinay o makadaot sa utok.

* Salmon (matang sa isda) — Usa kini sa masustansya nga pagkaong gikan sa dagat. Mao sab ni ang kinaham sa utok nga himsog. Dasok kini sa ‘omega 3’, nga makatabang sa utok nga hamugaway nga makasustiner sa kanunay nga lig-on sa pangutok. Magsilbe usab kini nga panagang sa makaugtas nga depresyon.

* Itlog—  Tinubdan sab ni sa pipila ka mga pampabaskog ug pagpahimsog sa utok, sama sa Vitamin B6, B12, foline ug choline. Ang choline sa itlog, gikinahanglan kini sa utok aron mopakusog nga maminten ang maayong memorya ug komunikasyon sa mga braincells.

* Redwine — Makayabag kini sa utok kon masubrahan sa pag-inom, apan makaayo usab ug mopaabtik kini sa luyahong utok. Gumikan kini sa antioxidants nga EGCG nga naa sa redwine ug green tea, aron pugngan ang protina nga moguba sa utok.

Ang 1-2 ka yarok sa kopeta, igo na nga mopagana ug mopatubo sa mas maayong komunikasyon taliwala sa mga selyula sa utok ug sa kaugatan.