Dear Atty. Divine,
Ang empleyado namo sa kompaniya nga nagtrabaho sulod na sa lima ka tuig miduso og resignation letter, effective immediately. Ang gibutang niya nga rason sa iyang resignation letter kay nasakit kuno siya ug kinahanglan siya nga mopahuway.
Gidawat sa HR ang iyang resignation letter, bisan kon wa siya motuman sa 30-day notice. Apan karong bag-o, nanawag siya ug nangayo’g separation pay kay dugay na kuno siya nga nagtrabaho sa kompaniya.
Ang akong pangutana kon obligado ba kami sa paghatag kaniya og separation pay nga miboluntaryo man siya sa pag-resign? Daghang salamat.-Jimmy
* * *
Dear Jimmy,
Wala’y provision sa Labor Code nga nagmando sa paghatag og separation pay sa mga empleyado nga boluntaryong mo-resign sa trabaho. Sa ato pa, dili obligado ang inyong kompaniya sa pagbayad og separation pay sa inyong empleyado nga mi-resign gawas lang kon kini nalatid sa employment contract o sa Collective Bargaining Agreement (CBA), o ba kaha nahimo na nga palisiya o practice sa kompaniya nga mohatag og separation pay sa mga empleyado nga mo-resign.
Apan kon dili kini mao ang practice sa inyong company ug wa sab kini malatid sa iyang employment contract, then dili kamo obligado nga mohatag kaniya og separation pay. Ang employer obligado lang nga mohatag og separation pay kon siya ang mitaktak sa trabahante for authorized causes, o kon ilegal niya nga gi-dismiss ang trabahante. Thanks and God Bless.- Atty. Divine
* * *
Alang sa inyong pangutana, ipadala lang sa Legal Corner sa Banat News sa V. Gullas St., Cebu City or email sa flores_divina@yahoo.com ug akong tubagon ang inyong pangutana pinaagi sa akong column matag Miyerkules, Sabado ug Domingo.