Grabeha ninyo uy!

Sa mga malambuon nga kanasuran, mogamit gyud sa ilang utok ang mga nagdumala sa trapiko. Kun may karsada nga ilang sirad-an, adto pa sa layo may gibutang na sila nga pahibalo aron masayod ang mga motorista ug makapangita og laing kaagian.

Nakapanglingu-lingo ko nga nagtan-aw sa grabeng traffic pag-abot nako sa eskina T. Padilla ug Sikatuna kagahapon sa udto. Gikan ko sa uptown ug paingon ko sa among opisina sa The Freeman nga nahimutang sa D. Jakosalem ug V. Gullas.

Nakakita ko nga giaspalto na ang kabahin sa Sikatuna Street gikan sa eskina T. Padilla paingon sa Bonifacio Street. Nag-aginod ang dagan sa mga sakyanan.

Mao diay kay mohunong gyud ang drayber pag-abot sa eskina Bonifacio.

Kadtong mopaingon unta sa downtown area dili na makalahos kay gibabagan kini sa duha ka pison nga naghunong lang taliwala sa karsada. May karatola nga “No Entry” ug ang mga sakyanan, wala’y laing mahimo gawas sa pagliko sa tuo kay “One way” ang Bonifacio Street.

Pag-abot sa Bonifacio eskina D. Jakosalem, ang drayber mapugos na usab sa pagliko paingon sa tuo, kay “One Way” man ang D. Jakosalem. Unsay mahitabo sa mga sakyanan nga paingon unta sa downtown?

Pastilan, kamo ba nga nagdumala sa trapiko dinhi sa dakbayan sa Sugbo, gamita sab intawon ang inyong mga utok uy. Mauwaw ta nga makurehian sa mga tawo nga wala’y kinaadman sa pagdumala og trapiko.

* * *

Buyno, nakahisgot na man gyud ta og Sikatuna Street, hisgotan na lang nato ang grabeng pag-abuso sa tagdumala niining building diha daplin sa karsada nga kilid sa sapa, nga nagnegosyo og puthaw.

Kamong nagdumala sa trapiko dinhi sa dakbayan, wala ba kamo makakita nga kining maong negosyante nakahasol kaayo sa pag-agi sa mga motorista diha sa Sikatuna Street kay ang ilang mga puthaw anaa giladlad daplin sa karsada nga alang unta sa pag-agi sa mga tawo?

Wala pa gyud matagbaw sa ilang pagpangabuso, ang daplin sa karsada atubangan sa ilang building kanunay’ng parkingan og mga sakyanan? Wala ba kamo makakita niini? Dili man tingali kamo mga buta nga dili makakita. Wala ba musantop sa inyong hunahuna nga pag-abuso na ang gihimo niining maong negosyante?

Muingon ko nga abusado kaayo ang maong negosyante kay, nakatampo sila nga maglunop ang eskina Bonifacio ug Sikatuna kun mag-uwan. Tan-awa ra gud ang karaang tulay diha nga nahimo kaniadtong 1920, miabot na sa tunga ang ilang building.

Kining maong negosyante og puthaw, nanag-iya kini og dako nga building nga nag-atbang diha nga pulos nakapagamay sa sapa.