EDITORYAL - Daghan ang nahasol

Ang kalipay sa pipila lang ka tawo, dili maayong ibaylo sa grabeng sakripisyo nga masinati sa kinabag-ang publiko. Unta, mosantop kini sa huna-huna ni Mayor Tomas Osmeña ug sa uban niya nga mga sinaligan nga maoy utok sa pagpahigayon og night market diha sa tumoy nga bahin dalan Colon dapit sa eskina Sikatuna.

Tingali gusto lang nila ni Mayor Osmeña ug sa iyang sinaligan nga si Francisco “Bimbo” Fernandez nga mahinangop kanila ang mga gagmay’ng negosyante nga makapamaligya sila gamit ang karsada.

Tinuod, nangalipay ang pipila ka negosyante kay makapamaligya man sila diha sa karsada nga para gyud unta sa mga sakyanan, bugti sa pagbagulbol sa mga motorista ug mga sumasakay.

Ang mga tinugyanan sa Cebu City Transportation Office nga maoy nagtan-aw kun ang maong kalihukan makabalda ba sa trapiko, hadlok usab nga mopadayag sa tinuod nga sitwasyon sa kabalaka nga mawad-an sila og trabaho kun masuko kanila ang mga nagpasiugda sa night market.

Kun ang kadagkoan sa CCTO mosulti lang gyud sa tinuod nga sitwasyon nga ang night market nakamugna og kahasol sa mga motorista, tingali pugngan gyud sa mayor ang pagpahigayon og night market dihang dapita. Unta, ang mga hingtungdang opisyal sa CCTO magbaton og kaisog ug ihiklin nila ang kabalaka nga sila kawad-an og trabaho sa pagtug-an nila sa matuod nga sitwasyon.

Ang night market mahimo gihapon nga ipahigayon apan kinahanglang sutaon ug tun-an gyud unta pag-ayo, ug adto kini himoa sa dapit nga dili kaayo makahasol ug daghang motorista ug mga sumasakay.  Ang pagsirado sa mga tigpasiugda sa night market sa dalan Sikatuna gikan sa Parian Barangay Hall paingon na Colon maoy nakapasamot sa sakripisyo sa mga motorista. 

Maoy angay’ng timan-an ni Mayor  Osmeña nga gipili siya sa kinabag-ang katawhan ug dili kay niana lang pipila ka tawo nga malipay sa pagpahigayon og night market kay sila makaganansya ug may ubang tawo nga tingali makakuwarta.