Pilipinas ug drugas

Nakadawat na og daghang pagsaway  dili ra dinhi sa Pilipinas ang kampanya sa administrasyong Duterte batok sa ilegal nga drugas. Ang extrajudicial killings sa mga gidudahang nalambigit sa ilegal nga drugas  wala makapakombinsir  sa international media ug international community nga kini ang labing epektibong sulbad sa problema.

Si UN Special Rapporteur on summary executions Agnes Callamard nihulagway sa baruganan ug mga pamahayag ni Presidente Duterte batok sa ilegal nga drugas nga usa ka lisensya sa pagpatay og tawo.

 Iyang gihulagway nga iresponsable ug nagdasig sa kagubot ang kamandoan sa pagpatay ug ang paghatag ganti sa kapolisan nga makapatay sa mga suspetsadong durugista nga mosukol kanila.

Sa labing uwahing ihap  sa ABS-CBN Investigative and Research Group sa mga napatay sa nagpadayong kampanya batok sa ilegal nga drugas  sugod sa Mayo 10 hangtod sa Agosto 30, 2016 niabot na  sa 1,288 ka suspetsadong durugista, 778 niini napatay sa kapolisan sa ilang operasyon, 404 ang napatay sa giingong mga vigilante. 

May 106 nga gilabay ug gisulod sa mga garbage bag o kaha giputos sa packaging tape nga may paskin nga "durugista ako, huwag tularan".

Apan unsa ba ka dako ang problema sa drugas sa Pilipinas nga kinahanglang unahon sa pagsulbad ni Presidente Duterte sulod sa tulo ngadto sa unom ka buwan?

Sa datus sa United Nations On Dugs and Crime kon  UNODC nga gipagawas sa Time Magazine sa Agosto upat ka nasud ang ilang gihimoan og pagtuon sa paggamit og shabu, opium ug cocaine.

Ang Pilipinas, Australia, Estados Unidos ug United Kingdom.  Sa shabu,  ang Pilipinas dunay 2.35 percent sa kinatibuk-ang kapin sa 100 ka milyon nga populasyon. Ang Estados Unidos dunay 2.20  porsiyento  sa 324,500,818 milyones nga populasyon ug ang Australia nga duna ray 24,163,303 milyones nga populasyon ang may labing taas nga nigamit og shabu, 2.90 porsiyento.

 Sa mga nag-edad kini og 15-64 anyos. Sa Opium ang Pilipinas dunay .05 porsiyento, Australia 3.3 percent ug ang  Estados Unidos dunay 5.41 percent. Sa cocaine ang Pilipinas dunay .03 percent,  Australia ug Estados Unidos nagtabla sa 2.10 percent ug ang United Kingdom 2.40 percent.

 Apan kining maong mga nasud wala molusad og all out war batok drugas. Sa usa ka editorial cartoon sa  New York Times gipakita si Presidente Duterte nga nagkupot og usa ka grenade launcher nga andam nang motira sa usa ka giulod nga mansanas nga gipatong sa ulo sa usa ka tawo nga nagrepresentar sa Pilipinas.

Sa mga nasuhito niining maong matang sa armas, hapay tanan ang maigo ini. Ang pagpatay ba sa mga ultimong durugista ang hingpit nga kasulbaran sa problema sa drugas sa Pilipinas?

Hinaot nga sa pagkakaron aduna nay laing pamaagi nga nahunahunaan ang administrasyong Duterte  sa pagtugkad nganong nilipang ang drugas sa Pilipinas