Extrajudicial killings

Sa unang adlaw sa Senate Inquiry sa extrajudicial killings sa mga tawo nga nalambigit sa negosyo sa ilegal nga drugas gikan sa mga adik ngadto sa pushers, nipadayag sa iyang kasagmuyo si PNP Director General Rolando dela Rosa sa pagbasol sa iyang ginsakpan sa laktod nga pagpatay sa ubang durugista.

Gidudahan nga gituyo na sa kapolisan ang pagpatay sa ubang durugista ug gihimo na lang nga rason nga sila nisukol. Kini tungod kay may pagtugot ni Presidente Rodrigo Duterte nga patyon ang si bisan kinsa nga mosukol ug dili sila magpatara sa mga durugista aron dili sila ang mapatay.

Ang ABS-CBN Investigative and Research Group may gihimo nga data gathering sa nangamatay sa kampanya batok sa ilegal nga drugas . Sa data nga ilang nakuha sugod sa Mayo 10 hangtud sa Agosto 23, 2016 niabot na sa 1,179 ang nangamatay sa mga gidudahan ug giila nga mga adik ug drug pusher ug pipila sa giila drug lords.

Sa 1,179 nga nangamatay 708 kon 60 porsiyento ang napatay sa police operation, may 373 kon 32 porsiyento nga napatay sa wala mailhi nga mga mamumuno nga gituohang mga vigilante. Ang average nga mapatay kada adlaw sa mga police operation moabot sa pito  ug sa kinatibuk-an may 11 nga mapatay sa usa ka adlaw.

Sa lehitimo nga mga drug operation sa kapolisan diin 60 porsiyento ang napatay, may makapaalarma nga kamatuoran nga gibaliwala ra sa katilingban ug sa mga otoridad. Ang 373 nga mga durugista kon 32 porsiyento nga gipatay sa gitawag nga mga vigilante. Bisan kun moingon ang kapolisan nga wala nila tugti ang maong mga grupo, apan bugnaw ilang pagpursige sa pag-ila kinsa kining maong tawo.

Wala silay katungod ug mandato sa pagpatay bisan unsa pa kasalbahis ang gipatay.

Dinhi sa Sugbo may pipila sa mga nabiktima sa vigilante killing ug extrajuducial killing nga walay igong kapasikaran.  Gani, pipila sa mga tarung nga polis  nakapanghupaw tungod kay ang pipila sa mga gipatay tataw  nga walay ikasukol.

Usa ka kaso pananglitan mao ang pagpusil sa usa ka nalisoan sa pangisip nga magsimhot og rugby ug naglatagaw sa kadalanan sa Colon, dakbayan sa Sugbo. Gipusil sa walay igong hinungdan. Nahitabo ni sa mga unang bahin sa Hulyo.

Kun gusto man nga motabang kining ubang magpakabayani sa pag-angkon og kalinaw sa katilingban gikan sa mga adik ug kriminal ang mas dakong hagit para nila mao ang pag-ila sa mga dagko ug impluwensyado nga mga kriminal ug dili ang mga yamokmok nga moikging na sa kahadlok bisan sa kaugalingon nilang mga anino.