Duol na gyud kaayo ang eleksyon 2016 diin anaa sa atong mga kamot ang pagpili sa atong mga lider sa nasud. Ang inyong kabomberohan hingpit na usab nga nangandam alang niining maong dakong kalihokan.
Gani mihatag usab kami og assistance pinaagi sa pagsiguro nga adunay naka-standby nga firetrucks sa matag City Hall ug munisipyo kay sagad anha man himoa ang pag-canvass sa mga election returns gikan sa kabarangayan aron kun may panginahanglan, makaresponde kini dayon.
Sa makausa pa, gihangyo ang tanan nga magpabiling alerto ug pag-amping kay misamot gyud ang atong nasinati nga kainit sa panahon, dungan sa kainit sa politika. Apan makalaom ang publiko nga ang inyong kabomberohan nagpabiling neutral ug walay gidapigan ni bisan kinsa nga politiko, bisan pa og nakatabang sila sa among ahensiya. Klaro kaayo ang balaod sa Civil Service Commission nga gidid-an ang mga kawani sa kagamhanan sa pagsalmot sa politika.
Hangyo namo sa publiko nga sa dili pa kamo mogawas sa inyong panimalay aron mobotar, isiguro nga naibot ang tanang de kuryente nga appliances ug mas labing maayo nga inyong palungon ang plangka.
Isiguro usab nga nakasirado ang atong LPG regulator sa dili pa kamo mobiya sa balay. Sa kataposan, ang inyong kabomberohan manghinaot nga maangkon nato ang usa ka honest, orderly ug peaceful election karong Lunes.
Unta ang tingog ug kabubot-on sa katawhan mao gyud ang mopatigbabaw ug walay anomaliya o ba kaha tikas nga mahitabo.